ملير: سنڌي ڳوٺ ۾ سنڌي ادبي سنگت شاخ پپري جون چونڊون

سالياني چونڊ جي صدارت ضلعي رابطا سيڪريٽري راشد لکمير ڪئي

ملير (عبدالرشيد مورجھريو) سنڌي ادبي سنگت شاخ پپري ملير جي سال 2026ع جي سالياني چونڊ گڏجاڻي سنڌي ڳوٺ پپري ۾ منعقد ٿي، جنهن جي صدارت ضلعي رابطا سيڪريٽري سائين راشد لکمير ڪئي. تقريب 26 اپريل آچر شام پنجين وڳي سنڌ برياني ريسٽورنٽ ۾ ٿي گذري. گڏجاڻي جي ڪارروائي شاخ جي اڳوڻي سيڪريٽري اصغر عادل قريشي هلائي، تقريب جي شروعات لطيف سائين جي وائي سان ڪئي وئي، جيڪا اسد ڪنگي پنهنجي خوبصورت آواز ۾ پيش ڪئي، جڏهن ته آيل مهمانن کي اجرڪن جا تحفا پڻ اوڍايا ويا. تقريب دوران ساٿين پنهنجو تعارف ڪرايو ۽ مقامي شاعرن پنهنجي تخليقن ذريعي محفل کي ادبي رنگ ڏنو. سائين عنايت قريشي ڪافي پيش ڪئي، جڏهن ته اصغر عادل قريشي، عاجز علي اڪبر ڀٽي، نصرالله ناز، صوفي نثار گل چنه، پرديسي پنهل مگسي، صداحسين عباسي ۽ نواز سيلرو پنهنجا غزل پڙهي ٻڌايا. منير احمد شيخ زاهد شيخ جي وائي ڳائي، جڏهن ته مهمان شاعر شبير لاکي نظم پيش ڪيو. آخر ۾ سائين راشد لکمير پڻ پنهنجو غزل پيش ڪري داد حاصل ڪيو. بعد ۾ چونڊ عمل دوران اميدوارن جا فارم پيش ڪيا ويا ۽ اتفاق راءِ سان بنا مقابلي نئين باڊي چونڊي وئي، جنهن جو اعلان ضلعي رابطا سيڪريٽري طرفان ڪيو ويو. نئين باڊي ۾ رجب ڀنڊ کي سيڪريٽري، نصرالله ناز ابڙو کي ڪائونسلر، منير احمد شيخ کي جوائنٽ سيڪريٽري، عاجز علي اڪبر ڀٽي کي آڊيٽر ۽ عبداستار پنهور کي خزانچي چونڊيو ويو، جڏهن ته ڪاروباري ڪاميٽي ۾ غلام محمد قريشي، اياز سومرو، عنايت قريشي، محرم علي ڀٽي ۽ اسدالله ڪنگو شامل آهن. تقريب ۾ اڳوڻي سيڪريٽري اصغر عادل قريشي نئين چونڊيل باڊي کي مبارڪباد پيش ڪندي اجرڪن جا تحفا سائين راشد لکمير جي هٿان اوڍايا. پنهنجي صدارتي خطاب ۾ سائين راشد لکمير چيو ته پپري شاخ کي فعال بڻائڻ ۾ اصغر عادل قريشي جي ڪوششن اهم ڪردار ادا ڪيو آهي ۽ هاڻي نئين باڊي تي ذميواري آهي ته هو محنت ۽ تسلسل سان شاخ کي وڌيڪ مضبوط بڻائين. پروگرام جي پڄاڻي تي اڳوڻي باڊي طرفان نئين باڊي حوالي ڪاروائي جو رجسٽر ۽ سمورو رڪارڊ پڻ ڪيو ويو، جڏهن ته تقريب خوشگوار ماحول ۾ اختتام پذير ٿي۔