ملير: ڀينس ڪالوني جي نجي اسپتال ۾ نوجوان ناري مبينا غلط انجيڪشن سبب فوت، ڪيس داخل

ملير (رپورٽ: عبدالرشيد مورجھريو)ڀينس ڪالوني ۾ قائم هڪ نجي اسپتال ۾ مبينا طبي غفلت ۽ غلط انجيڪشن لڳڻ سبب 24 ورهين جي ناري راڻي ٻرڙو، زال ڳهڻو ٻرڙو، فوت ٿي وئي، جنهن کانپوءِ وارثن سخت احتجاج ڪندي ذميوارن خلاف ڪارروائي جو مطالبو ڪيو آهي. واقعي بابت سکڻ ٿاڻي تي ڪيس داخل ڪيو ويو آهي جڏهن ته اسپتال جو عملو واقعي کانپوءِ فرار ٿي ويو ۽ اسپتال پڻ بند ملي آهي. فوتي ناري جي مڙس ڳهڻو ٻرڙو صحافين سان ڳالهائيندي الزام هنيو ته سندس گهرواري جي طبيعت اوچتو خراب ٿيڻ تي پاڙي ۾ موجود نجي اسپتال وٺي ويا، جتي مبينا عطائي ڊاڪٽر پهرين ڊرپ لڳائي ۽ پوءِ انجيڪشن هنئي، جنهن کان ڪجهه ئي دير پوءِ سندس گهرواري جي حالت بگڙي وئي ۽ هوءَ فوت ٿي وئي هن چيو ته، عطائي ڊاڪٽر منهنجي گهر واري کي غلط علاج ڪري قتل ڪيو آهي. پوليس فوري طور جوابدارن کي گرفتار ڪري مون کي انصاف فراهم ڪري.ٻئي طرف سکڻ ٿاڻي جي پوليس جو چوڻ آهي ته واقعي بابت ڪيس داخل ڪيو ويو آهي. شروعاتي جاچ دوران معلوم ٿيو آهي ته اسپتال مبينا طور عطائي ڊاڪٽر هلائي رهيو هو. واقعي کانپوءِ اسپتال بند ملي آهي ۽ عملو فرار ٿي ويو آهي. پوليس موجب جوابدارن جي گرفتاري لاءِ مختلف هنڌن تي ڇاپا هنيا پيا وڃن ۽ وڌيڪ جاچ جاري آهي وارثن ۽ علائقي واسين صحت کاتي ۽ لاڳاپيل اختيارين کان مطالبو ڪيو آهي ته غيرقانوني ۽ بنا لائسنس هلندڙ اسپتالن ۽ عطائي ڊاڪٽرن خلاف سخت ڪارروائي ڪري اهڙن افسوسناڪ واقعن جي ورجاءُ کي روڪيو وڃي.