ملير: ٻارن جي مزدوري جي خاتمي جي عالمي ڏينهن تي ابراهيم حيدري ۾ فٽبال ميچ

فٽبال ميچ جو جو مقصد مزدوري ۾ مصروف ٻارن کي صحتمن، تفريحي ۽ هاڪاري سرگرمين ۾ حصو وٺڻ جا موقعا فراهم ڪرڻ هو

ملير (رپورٽ: عبدالرشيد مورجھريو) ٻارن جي مزدوري جي خاتمي جي عالمي ڏينهن جي موقعي تي سماجي تنظيم ڊيوڪون (DevCon) پاران ڪي ايم ڊبليو (KMW) جي سهڪار سان هلندڙ چائلڊ پروٽيڪشن پراجيڪٽ تحت ابراهيم حيدري فٽبال گرائونڊ ۾ فٽبال ميچ جو اهتمام ڪيو ويو. پروگرام جو مقصد ٻارن جي مزدوري ۾ مصروف ٻارن کي صحتمند، تفريحي ۽ هاڪاري سرگرمين ۾ حصو وٺڻ جا موقعا فراهم ڪرڻ ۽ انهن جي کيڏڻ جي حق سميت مجموعي ڀلائي ۽ بهبود کي هٿي ڏيڻ هو، تقريب ۾ ڊيوڪون جي پراجيڪٽ ڪوآرڊينيٽر ساجده چنا مهمان خاص طور شرڪت ڪئي، جڏهن ته عابد رضا بلوچ، ايوب شان خاصخيلي، احسان علي خاصخيلي، هارون ناٿاڻي، محمد رفيق ابلواڻي، مقدس ۽ ٻين معزز شخصيتن پڻ شرڪت ڪئي، مقررَن ٻارن جي تحفظ ۽ تعليم جي اهميت تي زور ڏيندي هن قدم کي ساراهيو ۽ ٻارن کي هاڪاري سرگرمين ۾ ڀرپور حصو وٺڻ جي ترغيب ڏني. فٽبال ميچ ۾ ٻارن وڏي جوش ۽ جذبي سان شرڪت ڪئي ۽ پنهنجي صلاحيتن جو ڀرپور مظاهرو ڪيو، تقريب جي پڄاڻي تي فاتح ۽ رنر اپ ٽيمن ۾ ٽرافيون ورهايون ويون، جڏهن ته سڀني شرڪت ڪندڙ رانديگرن کي سندن دلچسپي، محنت ۽ سرگرم شرڪت جي اعتراف طور ميڊل پڻ ڏنا ويا، شرڪت ڪندڙن ان عزم جو اظهار ڪيو ته ٻارن کي مزدوري کان محفوظ ماحول، معياري تعليم ۽ صحتمند تفريحي موقعا فراهم ڪرڻ لاءِ گڏيل ڪوششون جاري رکيون وينديون