نوشهروفيروز ۾ خضدار مان اغوا ٿيل سعيد ميمڻ جي بازيابي لاءِ احتجاج

نوشهروفيروز(ڊر)بلوچستان مان اغوا ٿيل سعيد ميمڻ جي بازيابيءَ لاءِ 26هين ڏينهن نوشهرو فيروز ۾ سول سوسائٽي، سياسي، سماجي تنظيمن، وڪيلن ۽ سندس مِٽن مائٽن پاران احتجاجي مظاهرو ۽ ڪٺ مئن روڊ اللّٰه واري چوڪ تي ٿيو، جتي خطاب ڪندي عبدالشڪور عباسي، سنڌ بار ڪائونسل جي ميمبر عبدالستار لُهراڻي، اهلسنت جماعت جي مولانا نعمت اللّٰه فاروقي، امجد ميمڻ، ايم ظفر تڳر، اعظم ميمڻ، جي يوآءِ جي اڪرم علي پيرزادو، مسلم ليگ (ن) جي زاهد رند، ڊسٽرڪٽ بار جي جنرل سيڪريٽري شوڪت ٻوهيو، اختر ڀريجو، نذير احمد ميمڻ، طارق جوکيو، ۽ ٻين چيو ته 26 ڏينهن گذرڻ باوجود سعيد ميمڻ بازياب نه ٿي سگهيو آهي ۽ روز سندس بازيابي لاءِ پوري سنڌ ۾ احتجاج ٿي رهيا آهي. هنن چيو ته سعيد ميمڻ جي اغوا سبب پوري سنڌ جو شعور پريشان آهي ڇو جو سعيد ميمڻ نه رڳو ريٽائر ڪامورو پر سنڌ جو اديب، شاعر ۽ داڻشور آهي. هنن چيو ته اختر مينگل جي بيان کان پوءِ اختر مينگل سميت بلوچ اڳواڻن ۽ سنڌ، بلوچستان حڪومت کي سندس بازيابي لاءِ ڪوششون وٺي پوري سنڌ مان تشويش جي لهر کي ختم ڪرڻو پوندو.