تهران میں حکومتی حمایت کی ریلی کے قریب دھماکے

ایرانی سرکاری میڈیا کے مطابق مرکزی تہران میں زور دار دھماکوں کے جھٹکے محسوس کیے گئے ہیں۔ غیر ملکی میڈیا رپورٹس کے مطابق ہزاروں ایرانی یومِ القدس کے موقع پر فلسطینیوں کی حمایت میں مارچ میں شریک ہو رہے تھے۔ اطلاعات کے مطابق کچھ دھماکوں کی آوازیں اس مقام کے قریب سنی گئیں جہاں یہ مظاہرہ جاری تھا۔ برطانوی میڈیا کے مطابق دھماکوں کے بعد کئی ویڈیوز سوشل میڈیا پر گردش کر رہی ہیں۔ وائرل ویڈیوز میں ایرانی دارالحکومت تہران میں ایک دھماکہ دکھایا گیا ہے، جو حکومتی حمایت میں نکالی گئی ریلی کے قریب ہوا، جو یومِ القدس کے موقع پر منعقد کی گئی تھی۔ ایران میں یومِ القدس رمضان المبارک کے آخری جمعے کو منایا جاتا ہے۔ یہ دن 1979 میں اسلامی جمہوریہ کے بانی آیت اللہ روح اللہ خمینی نے فلسطینی مقصد کی حمایت اور اسرائیل کی مخالفت کے اظہار کے طور پر قائم کیا تھا۔ تہران کے مرکزی انقلاب اسکوائر کے قریب بنائی گئی ایک ویڈیو میں لوگوں کو "اللہ اکبر" اور "امریکہ مردہ باد" کے نعرے لگاتے سنا جا سکتا ہے، جبکہ پس منظر میں دھوئیں کے بادل نظر آ رہے ہیں۔ ویڈیوز میں یہ بھی دکھایا گیا ہے کہ مارچ کرنے والے ایرانی نئے سپریم لیڈر مجتبیٰ خامنہ ای کی تصاویر اٹھائے ہوئے تھے۔ اسرائیلی دفاعی افواج نے اس سے قبل اس علاقے کے قریب انخلا کی وارننگ جاری کی تھی جہاں سے یہ ریلی نکالی جانی تھی۔