عوامي تحريڪ ضلعي ملير جو اجلاس، 5 اپريل تي گلشن حديد ۾ احتجاجي ريلي جو اعلان

اجلاس ۾ عوامي تحريڪ جي مرڪزي سينيئر نائب صدر نور احمد ڪاتيار خصوصي شرڪت ڪئي

ملير (رپورٽ: عبدالرشيد مورجھريو) عوامي تحريڪ ضلعي ملير جي ڪائونسل جو اهم اجلاس ضلعي نائب صدر علي محمد ڪلمتي جي صدارت هيٺ منعقد ٿيو، جنهن ۾ عوامي تحريڪ جي مرڪزي سينيئر نائب صدر نور احمد ڪاتيار خصوصي شرڪت ڪئي۔ اجلاس ۾ 7 جون تي جنگشاھي ۾ عوامي تحريڪ جي قائد رسول بخش پليجو جي اٺين ورسي ۾ ڀرپور شرڪت لاءِ رٿابندي ڪئي وئي. ان موقعي تي فيصلو ڪيو ويو ته 5 اپريل تي گلشن حديد ۾ ايران مٿان آمريڪا ۽ اسرائيل جي مڙهيل جنگ، تيل جي وڌندڙ قيمتن ۽ مهانگائي خلاف احتجاجي ريلي ڪڍي ويندي۔اجلاس کي خطاب ڪندي نور احمد ڪاتيار چيو ته ڪراچي کي هڪ ڀيرو ٻيهر دهشتگردي جي خطري ڏانهن ڌڪيو پيو وڃي، جڏهن ته سنڌ کي ورهائڻ لاءِ مهم هلائي پئي وڃي. هن الزام لڳايو ته ڪوڙين ۽ بوگس چونڊن ذريعي هڪ پاسي ايم ڪيو ايم ۽ ٻي پاسي پيپلز پارٽي جي وڏيرن ۽ بااثر ماڻهن کي مڙهيو ويو آهي۔ هن چيو ته تعليم، صحت، زراعت ۽ آبپاشي سميت سمورن شعبن کي تباهه ڪيو ويو آهي ۽ سرڪاري ادارن ۾ ڪرپشن عروج تي پهچي چڪي آهي. هن وڌيڪ چيو ته جمهوريت جا دعويدار پاڪستان پيپلز پارٽي، پاڪستان مسلم ليگ (ن) ۽ پاڪستان تحريڪ انصاف آمريڪا ۽ اسرائيل طرفان ايران مٿان مڙهيل جنگ ۽ فلسطين، غزه، لبنان ۽ شام ۾ معصوم شهرين جي قتل جي مذمت ڪرڻ لاءِ تيار ناهن۔ نور احمد ڪاتيار چيو ته آمريڪا سميت دنيا ۾ جمهوريت جون دعوائون ڪندڙ قوتون بي نقاب ٿي چڪيون آهن. هن چيو ته ايران جي عوام پنهنجي ڌرتي جي دفاع لاءِ جيڪي قربانيون ڏنيون آهن، انهن کي سلام پيش ڪريون ٿا. سندس چوڻ هو ته آمريڪا پنهنجي مفادن لاءِ دنيا ۾ خونريزي ڪري عالمي انساني حقن کي لتاڙي ڇڏيو آهي، جڏهن ته دنيا جو پرامن عوام آمريڪي سامراج ۽ ان جي حمايتي حڪمرانن جي پاليسين کي قبول نه ڪندو۔اجلاس ۾ ضلعي ملير جي سيڪريٽري ايڊووڪيٽ خالد تنيو، ايڊووڪيٽ عبدالله ٻپڙ، عزيز لانگاهه، عباس ملاڻو، نوروز ڪلمتي، ماجد جروار، جبار پليجو، آصف نوحاڻي سميت ٻين اڳواڻن ۽ ڪارڪنن شرڪت ڪئي۔