ڪنري ۾ فٽبال چيمپئن ليگ سيزن 2 نائيٽ ايڊيشن جي آڪشن سرمني جي تقريب

تقريب جو مهمان خاص چيئرمين ڪنري سٽي حاجي شڪيل احمد باجوه هو

عمرڪوٽ(اسپورٽس نيوز ڪانجي مل رکيسر) ڪنري جي آڊيٽوريم هال ۾ فٽبال چيمپئن ليگ سيزن 2 نائيٽ ايڊيشن جي آڪشن سرمني جي پروقار ۽ رنگا رنگ تقريب منعقد ڪئي وئي، جنهن جو مهمان خاص چيئرمين ڪنري سٽي حاجي شڪيل احمد باجوه هو. جنهن ۾ سياسي ۽ سماجي اڳواڻ علي حسن لاشاري، چيئرمين يوسي ٿر نبي سر امير حسن خاصخيلي، وائس چيئرمين يونين ڪائونسل بوسٽان حاجي ضياءُ الرحمان ڀٽي ۽ ٽورنامينٽ جي سرپرست اعليٰ آصف چوڙا آرائين سميت رانديگرن ۽ شهرين وڏي انگ ۾ شرڪت ڪئي۔ان موقعي تي چيئرمين ڪنري سٽي حاجي شڪيل احمد باجوه ٽرافي جي رونمائي ڪئي. ٽورنامينٽ آرگنائيزرن عابد انور، احمد خان پٺاڻ، انعام الحق، رحمان پٺاڻ ۽ مشتاق ڀٽي طرفان مهمانِ خاص ۽ ٻين معزز مهمانن کي شيلڊون ۽ سنڌ جي ثقافت جي علامت اجرڪ جا تحفا پيش ڪيا ويا. تقريب کي خطاب ڪندي چيئرمين ڪنري سٽي حاجي شڪيل احمد باجوه چيو ته هڪ طرف جتي سماجي برائيون عام ٿي ويون آهن، اتي نوجوانن جو راندين جي سرگرمين ڏانهن راغب ٿيڻ هڪ ساراهه جوڳو عمل آهي۔ هن چيو ته راندين جا ميدان آباد ٿيڻ سان سماجي برائين ۾ گهٽتائي ايندي ۽ نوجوان نسل صحتمند سرگرمين ڏانهن مائل ٿيندو۔ هن وڌيڪ چيو ته اهڙن ايونٽن ڪرائڻ جو مقصد نوجوانن جي صلاحيتن کي اجاگر ڪرڻ آهي. هن ٻڌايو ته ٽورنامينٽ ۾ 8 ٽيمون حصو وٺنديون، جڏهن ته ان لاءِ 96 رانديگر چونڊيا ويا آهن.