پی ٹی آئی بانی کی صحت کا معاملہ، سلمان اکرم راجہ کی چیف جسٹس سے ملاقات، خدشات سے آگاہ کیا

اسلام آباد (ویب ڈیسک) پاکستان تحریکِ انصاف (پی ٹی آئی) کے رہنما سلمان اکرم راجہ کی چیف جسٹس یحییٰ آفریدی سے ملاقات ہوئی ہے۔ ذرائع کے مطابق، پی ٹی آئی رہنما سلمان اکرم راجہ اور چیف جسٹس یحییٰ آفریدی کے درمیان ملاقات 30 منٹ سے زائد وقت تک جاری رہی۔ ذرائع کا کہنا ہے کہ ملاقات کے دوران سلمان اکرم راجہ نے چیف جسٹس کو پی ٹی آئی کے خدشات سے آگاہ کیا۔ بعد ازاں سلمان اکرم راجہ نے میڈیا سے گفتگو کرتے ہوئے کہا کہ ہم آج صبح سے سپریم کورٹ کے باہر موجود ہیں، پی ٹی آئی بانی کی صحت سے بڑھ کر ہمارے لیے کچھ بھی اہم نہیں۔ سلمان اکرم راجہ نے کہا کہ آج صبح سے چیف جسٹس اور اٹارنی جنرل سے ملاقاتیں اور رابطے جاری رہے، سارا دن بھاگ دوڑ کے بعد جو کچھ حاصل ہوا، وہ قطعاً تسلی بخش نہیں۔ انہوں نے بتایا کہ آج کی بھاگ دوڑ کے بعد ہمیں اس حد تک کامیابی ملی ہے کہ ہمیں رپورٹ فراہم کی جائے گی، ہم نے آج سپریم کورٹ کے باہر ایک اخلاقی مقدمہ لڑا۔ بتایا گیا ہے کہ پی ٹی آئی بانی اور ان کی بہنوں کو طبی رپورٹس دی جائیں گی، رپورٹ ملنے کے بعد پی ٹی آئی بانی تک ان کے ذاتی ڈاکٹروں کی رسائی کی یقین دہانی بھی کرائی گئی ہے۔ سلمان اکرم راجہ کا کہنا تھا کہ پی ٹی آئی بانی کے وکلا، خاندان اور ساتھیوں سے ملاقات کے لیے جدوجہد جاری رہے گی، آئندہ کی حکمتِ عملی کے لیے آج ہی سیاسی کمیٹی کا اجلاس ہوگا، آج ہی تحریکِ تحفظِ آئین پاکستان سے ملاقات کی جائے گی، پی ٹی آئی کی سیاسی کمیٹی علامہ راجا ناصر عباس اور محمود اچکزئی سے مشاورت کے بعد حکمتِ عملی طے کرے گی۔ انہوں نے کہا کہ پی ٹی آئی بانی نے حکمتِ عملی کا حتمی اختیار محمود اچکزئی اور راجا ناصر عباس کو دیا ہے، آج کی میڈیکل رپورٹ سے پی ٹی آئی بانی کی آنکھ کی صورتحال کا علم ہو جائے گا، میڈیکل رپورٹ حاصل کرنا ہمارا بنیادی مقصد نہیں تھا۔ واضح رہے کہ سابق وزیرِ اعظم عمران خان سے اڈیالہ جیل میں ملاقات نہ کرانے پر خیبرپختونخوا کے وزیرِ اعلیٰ سہیل آفریدی اور سلمان اکرم راجہ سپریم کورٹ پہنچے تھے۔ جہاں سلمان اکرم راجہ اور لطیف کھوسہ نے سپریم کورٹ کے رجسٹرار اور اٹارنی جنرل سے بھی ملاقات کی۔ میڈیا سے گفتگو کرتے ہوئے سہیل آفریدی نے کہا کہ معاملہ آپریشن اور اڈیالہ سے پمز منتقل کرنے تک پہنچ گیا اور ہمیں بتایا بھی نہیں گیا، پمز اسپتال میں کوئی بھی ریٹینا اسپیشلسٹ موجود نہیں، ہم یہاں بیٹھ کر چیف جسٹس پاکستان کا انتظار کریں گے۔