ڪوئيٽا: نوڪنڊي جي قبائلين پاران ريڪوڊڪ مائيننگ ڪميونٽي پروگرام تي بي اعتمادي جو اظهار

ڪوئيٽا(م ڊ)ريڪوڊڪ مائيننگ جي ڪميونٽي پروگرام تي قبيلائي بي اعتمادي، سي ڊي سي ڪميٽي ٽوڙڻ جو مطالبو* نوکنڊي ۾ سردار شوڪت ايجباڙي ۽ سردار نور بخش جي اڳواڻي ۾ قبيلائي عمائدين گڏيل پريس ڪانفرنس ڪندي چيو ته ريڪوڊڪ مائيننگ پروجيڪٽ تحت قائم ڪيل ڪميونٽي ڊولپمينٽ ڪميٽي (سي ڊي سي) تي علائقي جي سمورن قبيلن بي اعتمادي جو اظهار ڪري ڇڏيو آهي۔ ان حوالي سان نوکنڊي جي سڀني قبيلائي اڳواڻن هڪ ڀريل پريس ڪانفرنس ۾ متفقه طور موجوده سي ڊي سي مينيجمينٽ ڪميٽي کي غير نمائندا ۽ عوامي اعتماد کان محروم قرار ڏيندي ان کي فوري طور ٽوڙڻ جو مطالبو ڪيو۔ قبيلائي اڳواڻن جو چوڻ هو ته آر ڊي ايم سي يا ريڪوڊڪ مائيننگ جي موجوده سي ڊي سي ڪميٽي کي علائقي جي ڪنهن به قبيلي، طبقي يا عوامي حلقن جي حمايت حاصل ناهي، جنهن سبب ريڪوڊڪ منصوبي سان لاڳاپيل عوامي ڀلائي جا پروگرام پنهنجي اصل روح موجب لاڳو نٿا ٿي سگهن۔ سندن چوڻ مطابق موجوده ڪميٽي زميني حقيقتن کان اڻواقف آهي ۽ عوامي مسئلا حل ڪرڻ بدران ڪميونٽي پروگرام کي سياسي مقصدن لاءِ استعمال ڪيو پيو وڃي۔ انهن وڌيڪ چيو ته ڪميٽي ۾ موجوده حڪمران جماعت بي اي پي بدران غير نمائنده جماعتن، جهڙوڪ تحريڪ انصاف ۽ تحريڪ لبيڪ، جي نمائندن کي شامل ڪيو ويو آهي، جيڪي عوامي اعتماد ۽ حمايت نٿا رکن۔ پريس ڪانفرنس ۾ چيو ويو ته ريڪوڊڪ منصوبو بلوچستان، خاص طور نوکنڊي جي عوام لاءِ ترقي ۽ خوشحالي جو وڏو موقعو آهي، پر غير متوازن ۽ غير مقبول نمائندگي تي ٻڌل سي ڊي سي سبب عوامي اعتماد ۽ حمايت کي سخت نقصان پهچي رهيو آهي، جيڪو ڪنهن به وڏي ترقياتي منصوبي لاءِ سٺو سنئوڻ ناهي۔ قبيلائي عمائدين واضح ڪيو ته هو ريڪوڊڪ مائيننگ ڪمپني جي سيڙپڪاري ۽ ترقياتي قدمن جا شڪرگذار آهن، پر سندن مطالبو آهي ته سي ڊي سي مينيجمينٽ ڪميٽي کي فوري طور ٽوڙي هڪ نئين، متوازي ۽ بااختيار ڪميٽي جوڙي وڃي، جنهن ۾ نوکنڊي جي سڀني قبيلن، مڪاتبِ فڪر ۽ عوامي طبقن جي حقيقي نمائندگي شامل هجي، جيئن ريڪوڊڪ مان حاصل ٿيندڙ فائدا شفاف، منصفانه ۽ عوامي ڀلائي لاءِ استعمال ٿي سگهن۔ آخر ۾ قبيلائي اڳواڻن ريڪوڊڪ مائيننگ ڪمپني جي اعليٰ عملدارن، خاص طور چيف ايگزيڪيوٽو آفيسر (سي اي او) کان مطالبو ڪيو ته هو هن معاملي جو فوري نوٽيس وٺن ۽ عوامي اعتماد جي بحالي ۽ ڪميونٽي پروگرام جي ساک بچائڻ لاءِ عملي قدم کنيا وڃن۔