ڊي سي ٺٽو پاران ڊسٽرڪٽ ايمرجنسي آپريشن سينٽر ٽيم سان اهم اجلاس

ٺٽو( محمد شفيق ڀٽي) ڊپٽي ڪمشنر ٺٽو سرمد علي ڀاڳت ضلعي ۾ پوليو جي خاتمي بابت ڊسٽرڪٽ ايمرجنسي آپريشن سينٽر ٽيم سان اهم اجلاس منعقد ڪيو. اجلاس ۾ پوليو مهم جي ڪارڪردگي، مائڪرو پلاننگ ، رفيوزل ڪيسز ۽ ٻين انتظامي معاملن جو تفصيلي جائزو ورتو ويو. اجلاس دوران لاڳاپيل ڊاڪٽرن، ڊبليو ايڇ او جي نمائندن ۽ پوليو مهم سان لاڳاپيل عملدارن ڊپٽي ڪمشنر کي پوليو مهم جي موجوده صورتحال، مائڪرو پلان تي عملدرآمد ۽ فيلڊ ۾ پيش ايندڙ مسئلن بابت تفصيلي بريفنگ ڏني. ان موقعي تي ڊپٽي ڪمشنر سرمد علي ڀاڳت هدايتون ڏيندي چيو ته پوليو جي خاتمي لاءِ وڌيڪ موثر ۽ جامع حڪمت عملي اختيار ڪرڻ وقت جي اهم ضرورت آهي. هن چيو ته رفيوزل ڪيسز گهٽائڻ لاءِ علائقي جي معزز ماڻهن، مذهبي اڳواڻن ۽ والدين سان رابطا وڌايا وڃن ته جيئن ماڻهن ۾ اعتماد پيدا ڪري سگهجي. ڊپٽي ڪمشنر وڌيڪ چيو ته مائڪرو پلاننگ کي وڌيڪ بهتر ۽ عملي بڻايو وڃي، ڇو ته مضبوط مائڪرو پلان ئي پوليو مهم جي ڪاميابي جي ضمانت آهي. هن هدايت ڪئي ته هو پنهنجي ذميوارين کي ايمانداري ۽ لگن سان نڀائين ۽ پوليو ٽيمن جي هر گهر تائين پهچ کي يقيني بڻائين. ڊپٽي ڪمشنر پوليو مهم مان مثبت نتيجن جي اميد ظاهر ڪندي چيو ته اسان سڀني جي گڏيل ڪوششن سان اميد آهي ته ضلعي کي جلد پوليو فري بڻائڻ ۾ ڪامياب ٿينداسين. اجلاس ۾ پوليو ايمرجنسي ٽيم پاران ڊپٽي ڪمشنر کي يقين ڏياريو ته ڏنل هدايتن تي مڪمل عمل ڪيو ويندو ۽ پوليو جي خاتمي لاءِ هر ممڪن قدم کنيا ويندا.