پاکستان کے غزہ امن بورڈ میں شمولیت کے فیصلے پر جماعتِ اسلامی کا سخت ردِعمل

لاہور (ویب ڈیسک) جماعتِ اسلامی کے امیر حافظ نعیم الرحمان نے وزیرِاعظم کی جانب سے غزہ بورڈ آف پیس میں شمولیت کے لیے امریکی صدر کی پیشکش قبول کرنے کے فیصلے کو مسترد کرتے ہوئے کہا ہے کہ یہ نوآبادیاتی نظام کی ایک نئی شکل ہے۔ ایکس پر جاری بیان میں حافظ نعیم الرحمان نے کہا کہ اس بورڈ میں عراق کو تباہ کرنے والے ٹونی بلیئر جیسے مجرم شامل ہیں۔ ان کے مطابق بورڈ آف پیس فلسطینیوں کے وسائل اور زمینوں پر قبضے کا نیا نظام ہے، جبکہ غزہ کی تعمیرِ نو کے نام پر امریکی قبضہ کسی صورت قابلِ قبول نہیں۔ انہوں نے کہا کہ پاکستانی وزارتِ خارجہ کا یہ مؤقف کہ پاکستان نے سلامتی کونسل کی قراردادوں کے تحت غزہ امن منصوبے کی حمایت کا اعلان کیا ہے، حقائق کے منافی ہے۔ خود ٹرمپ یہ کہہ چکا ہے کہ اس کا بورڈ آف پیس ایک دن اقوامِ متحدہ کی جگہ لے سکتا ہے، تو پھر اس موقف کے باوجود پاکستان کے لیے اس بورڈ میں شمولیت کا کیا جواز ہے؟ حافظ نعیم الرحمان نے مزید کہا کہ ہم ایک بار پھر واضح طور پر کہتے ہیں کہ پاکستان کی فوج کسی بھی صورت غزہ نہیں جانی چاہیے۔