ٺٽو-حيدرآباد روڊ تي آئل ٽينڪر کي باهه وڪوڙي ورتو

هيلايا اسٽاپ ڀرسان باهه ٽينڪر کي باهه لڳڻ سبب ڊرائيور سڙي زخمي

ٺٽو (شفيق ڀٽي) ٺٽو-حيدرآباد روڊ تي هيلايا اسٽاپ ڀرسان، ڪينجھر ٿاڻي جي سامهون تيل سان ڀريل ٽينڪر ڪلٽي ٿي باهه جي لپيٽ ۾ اچي ويو، جنهن جي نتيجي ۾ ٽينڪر مڪمل طور سڙي رک ٿي ويو، جڏهن ته ڊرائيور سڙي زخمي ٿي پيو. عيني شاهدن موجب ٽينڪر اوچتو بي قابو ٿي ڪلٽي ٿيو، جنهن کان پوءِ فوري طور ان ۾ باهه ڀڙڪي اٿي ۽ ڏسندي ئي ڏسندي باھ جي شعلن سڄي گاڏي کي پنهنجي لپيٽ ۾ آڻي ڇڏيو. باهه سبب ڀرسان قائم مارڪيٽ جي ڪيترين ئي دڪانن کي سخت نقصان پهتو، جڏهن ته پوليس چيڪ پوسٽ به باهه جي زد ۾ اچي وئي. مقامي ماڻهن پنهنجي مدد پاڻ تحت زخمي ڊرائيور کي فوري طور اسپتال منتقل ڪيو. آخري اطلاعن تائين فائر برگيڊ جون گاڏيون واقعي واري هنڌ پهچي باهه تي ضابطو آڻڻ جي ڪوششن ۾ مصروف هيون، جڏهن ته پوليس علائقي کي گهيري ۾ وٺي وڌيڪ نقصان کان بچڻ جي ڪوششون ۾ مصروف ھئي