ملير ۾ ناجائز لوڊشيڊنگ خلاف سماجي ڪارڪن آزاد مجتبيٰ جو زنجير پائي انوکو احتجاج

ملڪ جي حڪمرانن اسان کي مسئلن، مهانگائي ۽ بدترين لوڊشيڊنگ جي زنجيرن ۾ جڪڙي ڇڏيو آهي: آزاد مجتبيٰ

ملير(رپورٽ: عبدالرشيد مورجھريو) سماجي ڪارڪن آزاد مجتبٰی بدترين ۽ ناجائز بجلي لوڊشيڊنگ خلاف هڪ منفرد ۽ علامتي احتجاج رڪارڊ ڪرائيندي زنجير پائي پنهنجي گهر کان پيادل مارچ ڪيو ۽ ڪي اليڪٽرڪ آفيس اڳيان احتجاج ڪيو، احتجاج جي شروعات پي ايس 91 ڊسٽرڪٽ ڪورنگي يوسي 07 ماڊل ٽاؤن (ڪي اي گارڊن) کان ٿي جتان آزاد مجتبٰی هٿن ۾ احتجاجي چارٽ کڻي زنجير پائي پيادل سفر شروع ڪيو. هو مختلف علائقن ۽ شاهراهن مان ٿيندو ايئرپورٽ روڊ تي قائم ڪي اليڪٽرڪ آفيس جي مرڪزي گيٽ تائين پهتو جتي باقاعده احتجاج رڪارڊ ڪرايو ويو ان موقعي تي سندس ساٿ ۾ سديس فهيم، جي ايم گھانگھرو، ايڊووڪيٽ صدام سنڌي، ايڊووڪيٽ اياز لاڙ، فرحان سليم جٽ، قاسم چانڊيو، راشد قريشي ۽ ٻيا سماجي ڪارڪن پڻ موجود هئا جن احتجاج ۾ شرڪت ڪري يڪجهتي جو اظهار ڪيو، احتجاج دوران شرڪت ڪندڙن بينر ۽ پلي ڪارڊ کنيا هئا جن تي “ناجائز لوڊشيڊنگ ختم ڪريو” “پورو بل — مڪمل سروس ڏيو” جهڙا نعرا درج هئا.ان موقعي تي ميڊيا سان ڳالهائيندي سماجي ڪارڪن آزاد مجتبٰی چيو تہ ملڪ جي حڪمرانن اسان کي مسئلن، مهانگائي ۽ بدترين لوڊشيڊنگ جي زنجيرن ۾ جڪڙي ڄڻ غلام بڻائڻ جي ڪوشش ڪئي آهي، پر مان واضح ڪرڻ چاهيان ٿو ته اسين ڪنهن جا غلام ناهيون. بجلي، گيس ۽ بنيادي سهولتون اسان جو آئيني ۽ انساني حق آهن ڪو احسان ناهي. جيڪڏهن اسان جا حق کسيا ويا ته اسين هر فورم تي آواز اٿارينداسين ۽ هر ممڪن جدوجهد ڪنداسين، هن وڌيڪ چيو ته هي احتجاج ڪنهن ذاتي مفاد لاءِ نه پر عوامي حق لاءِ هو ۽ جيڪڏهن لوڊشيڊنگ جو مسئلو حل نه ٿيو ته احتجاج جو دائرو وڌيڪ وسيع ڪيو ويندو.