عمرڪوٽ ۾ ڪرڪيٽ ٽورنامينٽ جاري، حر شاهين فائنل ۾ پهچي وئي

سيد علي مردان شاهه ڊسٽرڪٽ اينڊ آل سنڌ هارڊ بال ڪرڪيٽ ٽورنامينٽ جو سيمي فائنل کيڏيو ويو

عمرڪوٽ (رپورٽ:ڪانجي مل رکيسر) ماروي گرائونڊ عمرڪوٽ ۾ جاري ٻيو الحاج مرحوم سيد علي مردان شاهه ڊسٽرڪٽ اينڊ آل سنڌ هارڊ بال ڪرڪيٽ ٽورنامينٽ، رحيمداڻي ڪرڪيٽ اڪيڊمي جي اهتمام هيٺ، اسپورٽس اينڊ يوٿ افيئرز ڊپارٽمينٽ حڪومتِ سنڌ ۽ ميونسپل ڪميٽي عمرڪوٽ جي سهڪار سان ڪاميابيءَ سان جاري آهي، ٽورنامينٽ جي شاندار ۽ سنسني خيز سيمي فائنل مقابلي ۾ حر شاهين ۽ اوڏ اسٽار جون ٽيمون آمهون سامهون ٿيون، حر شاهين ٽاس کٽي پهريان بيٽنگ ڪرڻ جو فيصلو ڪيو ۽ مقرر 20 اوورن ۾ 6 وڪيٽن جي نقصان تي 203 رنس ٺاهيا، حر شاهين طرفان شهروز ليفٽي شاندار 73 رنس ٺاهيا، جڏهن ته دانش شيخ رڳو 8 بالن تي جارحاڻا 40 رنس ٺاهي ۽ يوراج ليفٽي به 40 رنسن جي عمده اننگز کيڏي، جواب ۾ اوڏ اسٽار جي ٽيم مقرر 20 اوورن ۾ 9 وڪيٽن جي نقصان تي صرف 180 رنس ٺاهي سگهي، اوڏ اسٽار طرفان ڀرت 48 رنس ۽ مولچند 40 رنس ٺاهي مزاحمت ڪئي، پر ٽيم گهربل هدف حاصل ڪرڻ ۾ ناڪام رهي، اهڙي طرح حر شاهين سيمي فائنل کٽي فائنل لاءِ ڪواليفاءِ ڪري وئي، ٽورنامينٽ جو فائنل اڄ رحيمداڻي ڪرڪيٽ اڪيڊمي ۽ حر شاهين وچ ۾ کيڏيو ويندو، جنهن کي ڪرڪيٽ شوقين هڪ تاريخي مقابلو قرار ڏئي رهيا آهن، فائنل ڏسڻ لاءِ ضلع عمرڪوٽ سميت ميرپورخاص ڊويزن جي مختلف علائقن مان ڪرڪيٽ شوقينن جي وڏي انگ ۾ آمد متوقع آهي، شاندار بيٽنگ ۽ آل رائونڊ ڪارڪردگيءَ تي شهروز آرائين کي مين آف دي ميچ قرار ڏنو ويو، جن کي رحيمداني ڪرڪيٽ اڪيڊمي جي صدر رسول بخش رحيمداني طرفان نقد انعام ڏنو ويو، ميچ دوران ڪمينٽيٽر منير نهڙي به پنهنجا جوهر ڏيکاريا، جڏهن ته اسڪورر فقير ياسر بهترين اسڪارنگ جا فرض نڀائي سٺي ڪارڪردگي جو مظاهرو ڪيو.