ڪنري ۾ ڪرسمس جي تقريب، مڪتب فڪر جي ماڻھن پاران شرڪت

ٻارن سنڌي، بلوچي، پنجابي، پٺاڻ ۽ مارواڙي ذاتين تي ٻڌل شاندار ٽيبلوز پيش ڪري داد حاصل ڪيو

عمرڪوٽ(رپورٽ:ڪانجي مل رکيسر) ڪنري ۾ ڪرسمس جي تقريب، مڪتب فڪر جي ماڻھن پاران شرڪت ڪري مذھبي ھم آھنگي ۽ خوشين جو اظھار، ٻارن پاران ٽيبلوز ۽ گيت پيش، ڪيڪ ڪاٽيو ويو. تفصيل موجب ڪنري ۾ ڪرسمس جون خوشيون ورھائڻ جي حوالي سان شاندار تقريب ڪوٺائي وئي، پيس ڪميونٽي گروپ ڪنري پاران سماجي تنظيم سول سوسائٽي سپورٽ پروگرام جي سهڪار سان منعقد تقريب ۾ اسسٽنٽ ڪمشنر ڪنري محمد خان ڀنگوار، سول سوسائٽي سپورٽ پروگرام جي ضلعي ميئنيجر مير حسن آريسر، پيس ڪميونٽي گروپ جي تعلقي صدر راجا اسد علي علوي، راجا جھانسن، پ پ اڳواڻ فقير نواز علي سومرو، ڀڳت گينو ڪولھي، مولوي شھزاد قادري، اسلم جھوني، پاسٽر ساجن، مسيح برادري جي عورتن، ٻارن، سياسي، سماجي اڳواڻن سميت مڪتب فڪر جي ماڻھن وڏي انگ ۾ شرڪت ڪئي ۽ مذھبي ھم آھنگي جي مثال قائم ڪئي وئي، ان موقعي تي ٻارڙن پاران ڪرسمس ۽ لوڪ گيتن تي رقص پيش ڪيو، جڏھن ته ٻارن سنڌي، بلوچي، پنجابي، پٺاڻ ۽ مارواڙي ذاتين تي ٻڌل شاندار ٽيبلوز پيش ڪري خوب داد حاصل ڪيو، تقريب ۾ هڪ خوبصورت ڪرسمس ٽري پڻ لڳايو ويو، جڏھن ته تقريب ۾ موجود سمورن ٻارن ۽ مھمانن کي چاڪليٽن ۽ ٽافين جا تحفا ڏنا ويا، تقريب ۾ اسسٽنٽ ڪمشنر محمد خان خطاب ڪندي چيو ته پاڪستان ۾ سمورن مذهبن ۽ مسلڪن کي مڪمل مذهبي آزادي حاصل آهي. هنن چيو ته تحريڪِ پاڪستان کان وٺي قيامِ پاڪستان تائين مسيحي برادري اهم، قابلِ فخر ۽ تاريخي ڪردار ادا ڪيو، جنهن کي ڪڏهن به وساري نٿو سگهجي. ان موقعي تي سول سوسائٽي سپورٽ پروگرام (CSSP) جي ڊسٽرڪٽ مئنيجر مير حسن آريسر چيو ته سندن اداري جو بنيادي مقصد سماج ۾ محبت، رواداري ۽ ڀائيچاري جو پيغام عام ڪرڻ ۽ نفرت ۽ تعصب جو خاتمو ڪرڻ آهي. هن سنڌ حڪومت پاران پهريون ڀيرو اقليتن لاءِ شادي رجسٽريشن بل جي منظوري کي ساراهه جوڳو ۽ تاريخي قدم قرار ڏنو، هن چيو ته اقليتن جي حقن جي تحفظ لاءِ سڀ کان وڌيڪ قانونسازي سنڌ حڪومت ڪئي آهي، پ پ پ ضلعي عمرڪوٽ جي جنرل سيڪريٽري صوفي نواز علي چيو ته سنڌ حڪومت اقليتن جي حقن جي تحفظ ۽ کين برابر موقعا فراهم ڪرڻ لاءِ عملي ۽ اثرائتا قدم کڻي رهي آهي. هن چيو ته شهيد ذوالفقار علي ڀٽو ۽ شهيد محترمه بينظير ڀٽو هميشه اقليتن جي حقن لاءِ جدوجهد ڪئي. سندس چوڻ هو ته پاڪستان مختلف مذهبن جي پوئلڳن جو گڏيل وطن آهي ۽ امن، رواداري ۽ ڀائيچارو ئي سماجي ترقي جي مضبوط بنياد آهي، پيس ڪميٽي گروپ تعلقه ڪنري جي صدر راجا اسد علي علوي چيو ته پاڪستان سمورن مذهبن جي پوئلڳن جو گڏيل وطن آهي، جتي امن ۽ ڀائيچاري کي هٿي ڏيڻ اسان سڀني جي گڏيل ذميواري آهي. هن چيو ته سندن تنظيم پڻ سماج ۾ محبت جو پيغام عام ڪرڻ ۽ نفرت جي خاتمي لاءِ سرگرم عمل آهي، اسان کي سڀني مذهبن جي تھوار ۾ ڀرپور نموني شرڪت ڪرڻ گهرجي ۽ سڀني مذهبن جو احترام ڪرڻ گهرجي ڪرسمس جو تھوار محبتون ۽ خوشيون ورھائڻ جو ڏڻ آھي پروگرام جي پڄاڻي تي ڪرسمس جو ڪيڪ ڪٽيو ويو ۽ ملڪي ترقي ۽ خوشحالي لاءِ دعا گهري وئي.