سنڌ جي لاءِ لڳا اينداسين، خاموش نه ويهنداسين، خاموش نه ويهنداسين: اياز لطيف پليجو

اياز لطيف پليجو کي اوساڪا ۾ رھندڙ سنڌين پاران آجياڻو، کيس اجرڪون اوڍايون ويون

حيدرآباد (بيورو) قومي عوامي تحريڪ جي سربراھ اياز لطيف پليجو کي اوساڪا ۾ رھندڙ سنڌين آجياڻو ڏنو. کيس اجرڪون اوڍايون ويون. ان موقعي تي خطاب ڪندي اياز لطيف پليجي چيو تہ سنڌ جي لاءِ لڳا اينداسين، خاموش نہ ويهنداسين. ھن وقت اقتدار جي ڪرسي تي پيپلزپارٽي آھي ان خلاف بيٺل آھيون، سڀاڻ ڪا ٻي پارٽي اچي سنڌ جو اھڙو حشر ڪندي تہ ان خلاف لڳا اينداسين، ھنن کان اڳ ۾ ضياء ۽ مشرف خلاف ھئاسين، اسان جو ڪم آھي سنڌ دشمنن خلاف جدوجھد ڪرڻ. اياز لطيف پليجي چيو تہ پنج يا ڏھ ڄڻا بزدل ۽ ڀاڙي لشڪر جي اڳواڻي ڪري ويٺا آهن تنھن ڪري لشڪر ڀاڙي ٿوري آهي ٻہ، ٽي وڏيرا، سردار، مرشد، جاگيردار حڪومت لاءِ اڳيان پويان پيا ڊوڙن. پاڻ ناشتي ۾ کائون بيضو، پٽاٽا ھي وري اسان جا دلبر پيپلا ناشتي ۾ کائين ڪروڙ، ٻنپهرن ۽ رات جو کائين ڪروڙ سنڌ جا اربين روپيا لٽي ۽ سنڌ جي ست ڪروڙ سنڌين کي تباھ ۽ برباد ڪري سنڌ کي ڀڙڀانگ ڪري ڇڏيو اٿن. اياز لطيف پليجي چيو تہ پيپلزپارٽي جي سنڌ حڪومت پبلڪ سروس ڪميشن ذريعي نوڪريون وڪرو ڪري ڇڏيون. روڊ، شھر، ذخيرا، پاڻي زمينون، وسيلا، جبل، ڪارونجهر، ڪينجهر، تاريخي ماڳ سنڌ جي ھر شئي ڀڳڙن مٺ تي وڪڻي ڇڏيون آهن. ھي سنڌ کي پنھنجي ذاتي ملڪيت ۽ جاگير سمجھن ٿا. اياز لطيف پليجي چيو تہ پيپلزپارٽي جا حڪمران چون ٿا پيپلزپارٽي شھيدن جي پارٽي آهي تنھن ڪري اسان جي مرضي آهي ۽ سنڌ جا وارث بہ اسان آھيون. سنڌ جي تقديرن جا فيصلا اسان ڪنداسين. اياز لطيف پليجي چيو تہ اسان کي شھيد ذوالفقار علي ڀٽو ۽ شهيد بينظير ڀٽو لاءِ لک دفعا احترام آهي پر ھر شھيد اھم ۽ مقدس آھي. اياز لطيف پليجو کان وٺي ھر ليڊر ۽ شھيد کان بہ وڌيڪ سنڌ جي ڌرتي ۽ سنڌ جو وطن اھم ۽ مقدس آهي. سنڌ کي تين وال نہ ڪريو، سنڌ جو سودو نہ ڪيو، سنڌ کي ڀڳڙن مٺ تي نہ وڪرو ڪريو. ائين نہ ڪيو. جڏهن توهان سڀاڻي نہ ھجو توهان جي قبرن ۽ آخري آرام گاھن ڀرسان ڪنهن مٽ مائٽ جي قبر تي سنڌي اچي دعا گھرن، ان کي ٻڌائين ڀرسان فلاڻي جي قبر آهي، اوڏانهن منھن ڀڇڙو ڪري ان پاسي کان ھليو وڃي ۽ چوي ھتي فلاڻو ماڻهو دفن ٿيل جنهن سنڌ وڪڻي ڇڏي آهي.