ملاقات کی اجازت نہ ملنے پر عمران خان کی بہنوں نے اڈیالہ جیل کے قریب دھرنا دے دیا

راولپنڈی (ویب ڈیسک): پاکستان تحریک انصاف کے بانی عمران خان کی بہنوں اور چیئرمین پی ٹی آئی بیرسٹر گوہر کو ملاقات کی اجازت نہ ملنے پر انہوں نے اڈیالہ جیل کے قریب فیکٹری ناکہ پر دھرنا دے دیا۔ اڈیالہ جیل میں ملاقات کا وقت ختم ہو گیا، جس کے باعث بیرسٹر گوہر اور عمران خان کی بہنیں ملاقات نہ کر سکیں۔ پولیس نے عمران خان کی بہنوں کو فیکٹری ناکہ پر روک دیا۔ علیمہ خان نے کارکنوں کو پرسکون رہنے کی ہدایت کی اور انہیں ناکہ سے پیچھے ہٹاتی رہیں۔ انہوں نے کہا کہ پولیس سے ہمارا کوئی جھگڑا نہیں، پولیس والے ہمارے بھائی ہیں، کارکنوں کو اس لیے پیچھے کر رہی ہوں کیونکہ خواتین ساتھ ہیں، پولیس والے خود بھی پریشان ہیں۔ علیمہ خان نے کہا کہ ملاقات کی اجازت کافی عرصے سے نہیں دی جا رہی، گزشتہ ملاقات میں کوئی سیاسی گفتگو نہیں ہوئی۔ عمران خان کو کس کے حکم پر قید میں رکھا گیا ہے؟ ہم ملاقات کے لیے آئے ہیں اور پچھلے ایک ماہ سے اسی مقصد کے لیے آ رہے ہیں۔ عمران خان کی بہنوں نے اڈیالہ جیل کے قریب فیکٹری ناکہ پر دھرنا دے دیا، جس میں قومی اسمبلی کے رکن جنید اکبر، شاہد خٹک، خیبر پختونخوا کابینہ کے ارکان مینا خان، شفیع جان اور دیگر رہنما بھی موجود تھے۔ اڈیالہ جیل جانے والا راستہ بند کر دیا گیا ہے اور فیکٹری ناکہ پر پولیس کی بھاری نفری تعینات ہے۔