ٹرمپ طاقت کے زور پر پوری دنیا پر حکمرانی کے خواب دیکھ رہا ہے: ستار رند / لال جروار

ٹنڈو باگو (پ ر) عوامی تحریک کے رہنما ایسرداس کولہی کی پہلی برسی کے موقع پر خراجِ عقیدت پیش کیا گیا۔ کھڈھرو سے ریلی نکالی گئی اور آخری آرام گاہ پر پھولوں کی چادر چڑھائی گئی، جس کے بعد جلسہ منعقد ہوا۔ جلسے میں عوامی تحریک، سندھی ہاری تحریک اور سندھیاڻي تحریک کے رہنماؤں سمیت گرد و نواح کے عوام کی بڑی تعداد نے شرکت کی۔ عوامی تحریک کے اس بہادر اور جدوجہد کرنے والے رہنما کی برسی کے جلسے سے خطاب کرتے ہوئے عوامی تحریک کے مرکزی نائب صدر ستار رند، لال جروار، مہران درس، جاکھرو نوحاڻي، زرقا ہالیپوٽو، بیگم زیور، مختیار بکاري، مرتضیٰ شام، ستو کولہی، آنند کولہی، سلیمان ہالیپوٽو، ہمیرو مل، سیتا کولہڻ، پاری کولہڻ، کنول، نارائن داس اور گامون کولہی نے کہا کہ ایسرداس کولہی عوامی تحریک کے بانی قائد رسول بخش پلیجو کے دیے ہوئے محنت کش انقلابی فکر، نظریے اور راستے کے سچے اور وفادار سپاہی تھے۔ وہ زندگی کی آخری گھڑی تک پارٹی سے وابستہ رہے اور سندھ دشمن قوتوں کے خلاف تمام جدوجہد میں سرگرم رہے۔ انہوں نے ایک مثالی عوامی انقلابی زندگی گزاری۔ ہمیں اپنے ساتھی کی وفاداری اور جدوجہد پر فخر ہے اور ہم انہیں سرخ سلام پیش کرتے ہیں۔ رہنماؤں نے کہا کہ امریکی سامراج پر تیسری عالمی جنگ کا بھوت سوار ہے۔ امریکا دنیا میں اپنی لاٹھی کی حکمرانی قائم رکھنے کے لیے انسانوں کا خون بہا رہا ہے۔ شام، لبنان، عراق، افغانستان اور فلسطین کے بعد اب امریکا ایران، وینزویلا، کیوبا، کولمبیا اور برکینا فاسو میں بھی خون کی ندیاں بہانا چاہتا ہے۔ امریکی سامراج دنیا پر اپنی بالادستی قائم رکھنے کے لیے مختلف ممالک میں جنگیں اور مداخلت کر رہا ہے اور عالمی امن و سلامتی کے لیے خطرہ بن چکا ہے۔ انہوں نے کہا کہ ڈونلڈ ٹرمپ طاقت کے زور پر پوری دنیا پر حکمرانی کے خواب دیکھ رہا ہے۔ انسانی حقوق، آزادی اور جمہوریت کے نام پر صدر ٹرمپ آزاد اور خودمختار ممالک پر حملے کر کے عوام کی آزادی اور خودمختاری پر شب خون مار رہا ہے۔ وینزویلا کے صدر اور ان کی اہلیہ کو اغوا کر کے امریکا نے عالمی دہشت گردی کا ثبوت دیا ہے۔ رہنماؤں کا کہنا تھا کہ جنگی اخراجات کے باعث امریکا قرضوں میں ڈوب چکا ہے اور اپنی دفاعی ضروریات پوری کرنے کے لیے دنیا کے تمام ممالک کے وسائل پر قبضہ کرنا چاہتا ہے۔ امریکا سندھ کے وسائل پر بھی قبضے کی سازش کر رہا ہے، جبکہ ملک کے حکمران سندھ، بلوچستان اور خیبر پختونخوا کے وسائل امریکا کے حوالے کرنے کی خفیہ ڈیل کر چکے ہیں۔ انہوں نے کہا کہ پاکستان کے حکمران اس امریکی صدر ٹرمپ کو امن کا نوبل انعام دینے کے مطالبات کر رہے ہیں جو دنیا پر تیسری عالمی جنگ مسلط کرنا چاہتا ہے، آزاد اور خودمختار قوموں کی آزادی سلب کر رہا ہے اور فلسطین میں معصوم بچوں سمیت لاکھوں فلسطینیوں کو اسرائیل کے ہاتھوں قتل کروا رہا ہے۔ پاکستان کے حکمرانوں نے ملک کے 25 کروڑ عوام کو امریکی سامراج، آئی ایم ایف اور عالمی سامراجی اداروں کے ہاتھوں فروخت کر دیا ہے۔ رہنماؤں نے مزید کہا کہ سندھ میں گزشتہ اٹھارہ برسوں سے پیپلز پارٹی کی عوام دشمن جاگیردارانہ ٹولی کی حکمرانی ہے، جس نے اقتدار کی خاطر سندھ کی قومی اجتماعی مفادات اور وسائل فروخت کر دیے ہیں۔ سندھ پولیس کو وڈیروں، جاگیرداروں اور قبائلی سرداروں کے ماتحت کر کے پولیس اسٹیٹ میں تبدیل کر دیا گیا ہے اور قتل و غارت کا لائسنس دے دیا گیا ہے۔ پیپلز پارٹی کے اٹھارہ سالہ دورِ اقتدار میں ڈاکو راج، لاقانونیت، منشیات، صحت و تعلیم کی تباہی اور کرپشن کے سوا عوام کو کچھ نہیں ملا۔