عمرڪوٽ ۾ راندين جي واڌ لاءِ ضلعي اسپورٽس ڪوآرڊينيشن ڪميٽي قائم

جاري ٿيل نوٽيفڪيشن موجب ڊپٽي ڪمشنر عمرڪوٽ ڪميٽي جو چيئرمين هوندو

عمرڪوٽ (رپورٽ:ڪانجي مل رکيسر) سنڌ حڪومت جي هدايتن جي روشني ۾ ضلع عمرڪوٽ ۾ راندين جي واڌ ويجهه، نوجوانن کي مثبت سرگرمين ڏانهن راغب ڪرڻ ۽ اسپورٽس انفراسٽرڪچر کي بهتر بڻائڻ لاءِ ضلعي اسپورٽس ڪوآرڊينيشن ڪميٽي فوري طور تي قائم ڪئي وئي آهي، ان حوالي سان ڊپٽي ڪمشنر عمرڪوٽ نويد رحمان لاڙڪ طرفان باقاعده نوٽيفڪيشن جاري ڪيو ويو آهي، جاري ڪيل نوٽيفڪيشن موجب ڊپٽي ڪمشنر عمرڪوٽ ڪميٽي جو چيئرمين هوندو، جڏهن ته ڊسٽرڪٽ اسپورٽس آفيسر کي سيڪريٽري ۽ خزانه دار جون ذميواريون سونپيون ويون آهن، ڪميٽي ۾ ڊسٽرڪٽ ايجوڪيشن آفيسر، چيف ميونسپل آفيسر، ڊپٽي سپرنٽنڊنٽ آف پوليس، ڪاليجن جا نمائندا، چيمبر آف ڪامرس، ڪيڊٽ ڪاليج يا پبلڪ اسڪول جو پرنسپل، ان سان گڏوگڏ ضلعي جون نامور راندين سان لاڳاپيل شخصيتون ۽ اسپورٽس ايسوسيئيشنز جا نمائندا پڻ شامل ڪيا ويا آهن، ڪميٽي ۾ شامل نمايان راندين جون شخصيتون رحيمداڻي ڪرڪيٽ اڪيڊمي جو صدر رسول بخش رحيمداڻي، عبدالجبار ڀلارو، خادم حسين هاليپوٽو ۽ رياض ڪنڀر شامل آهن، جيڪي ضلعي ۾ راندين جي واڌ لاءِ پنهنجون خدمتون سرانجام ڏيندا، نوٽيفڪيشن ۾ واضح ڪيو ويو آهي ته ڪميٽي ضلعي سطح تي راندين جي سرگرمين لاءِ ساليانو ڪيلنڊر تيار ڪندي، اسپورٽس گرائونڊز ۽ سرڪاري راندين جون سهولتون محفوظ ۽ بهتر انتظام هيٺ آڻيندي، ضلعي اسپورٽس ٽيمن جي تشڪيل ۽ تربيت ۾ مدد ڪندي ۽ ڇوڪرن ۽ ڇوڪرين لاءِ ڪوچنگ ڪيمپس منعقد ڪندي، ان کان علاوه ڪميٽي نجي شعبي، نيم خودمختيار ادارن ۽ سنڌ اسپورٽس بورڊ سان رابطي ۾ رهي اسپورٽس انفراسٽرڪچر جي ترقي، نون ترقياتي منصوبن بابت تجويزون ۽ شفاف مالي نظام کي هٿي ڏيندي، ڪميٽي هر ٻن مهينن ۾ اجلاس منعقد ڪندي ۽ پنهنجي سالياني ۽ آڊٽ رپورٽون اسپورٽس ڊپارٽمينٽ ڏانهن موڪليندي، ضلعي انتظاميه موجب هن قدم سان عمرڪوٽ جي نوجوانن کي صحتمند سرگرمين جا موقعا ملندا ۽ ضلعي ۾ راندين جو ماحول وڌيڪَ بهتر ٿيندو، شهري حلقن ۽ راندين سان لاڳاپيل ماڻهن ڪميٽي جي قيام کي خوش آئند قرار ڏيندي اميد ظاهر ڪئي آهي ته هي قدم عمرڪوٽ ۾ موجود ٽيلنٽ کي اجاگر ڪرڻ ۾ اهم ڪردار ادا ڪندو.