سال 2026 کا پہلا سپر مون 3 جنوری کو طلوع ہوگا، جو وولف مون کے نام سے جانا جاتا ہے اور آسمان پر معمول سے بڑا اور روشن دکھائی دے گا۔
پاکستان اسپیس اینڈ ایٹمی ریسرچ آرگنائزیشن (سپارکو) کے اعلامیے کے مطابق سال 2026 کا پہلا سپر مون 3 جنوری کو طلوع ہوگا۔ یہ سپر مون روایتی طور پر وولف مون کہلاتا ہے اور گزشتہ اکتوبر 2025 سے شروع ہونے والے سپر مونز کے سلسلے کا آخری چاند بھی ہے۔
اعلامیے میں بتایا گیا کہ 3 جنوری کی شام 5 بجکر 51 منٹ پر پاکستان میں سپر مون طلوع ہوگا، اور اس دوران چاند کی روشنی 99.8 فیصد ہوگی۔ سپر مون عام چاند کے مقابلے میں 6 سے 7 فیصد بڑا اور تقریباً 10 فیصد زیادہ روشن دکھائی دے گا، جبکہ زمین اور چاند کے درمیان فاصلہ تقریباً 362,312 کلومیٹر ہوگا۔
ماہرین فلکیات کے مطابق یہ سپر مون فلکیاتی طور پر بھی اہمیت رکھتا ہے کیونکہ اسی دوران کوآڈرینٹڈ شہابی بارش اپنی انتہا پر ہوگی۔ سپارکو کے مطابق یہ موجودہ سپر مون سلسلے کا آخری واقعہ ہے اور اگلا سپر مون نومبر 2026 میں ہوگا، جو سال کا دوسرا اور آخری سپر مون ہوگا۔
0 تبصرے