ملير مان اغوا ڄاڻايل نوجوان ناري مهينو گذرڻ باوجود بازياب نه ٿي سگهي

لڪشمي ڪمپني ۾ ڊيوٽي ڪندڙ منيشاء ڌي سڀاڳو مھيشوري کي هٿ نه ڪري سگهي

ملير (عبدالرشيد مورجھريو)ايڪسپورٽ پروسيسنگ زون جي لڪشمي ڪمپني ۾ ڊيوٽي ڪندڙ نوجوان ناري منيشاء ڌي سڀاڳو مھيشوري، رهواسي مجيد ڪالوني، کي 2 ڊسمبر تي مبينا طور آصف پنجابي اغوا ڪري کڻي ويو، جنهن جو اڃان تائين ڪو به ڏس پتو معلوم نه ٿي سگهيو آهي اغوا واري واقعي بابت متاثر نياڻي جي وارثن طرفان پوليس کي اطلاع ڏنو ويو، پر پوليس ايف آئي آر کي اي ڪلاس ڪري رکيو آهي، جنهن سبب واقعي جي جاچ ۾ سنجيدگي نظر نٿي اچي. وارثن پي سڀاڳو ۽ ڀائو ساگر مهينگواڙ جو چوڻ آهي ته آصف پنجابي جي واٽس ايپ نمبر تان منيشاء جون ڪجهه وائيس ميسيجز ۽ مبينا نڪاح نامي جا ڊاڪيومينٽس به موڪليا ويا آهن، پر ان باوجود پوليس اڃان تائين نه منيشاء کي بازياب ڪرائي سگهي آهي ۽ نه ئي جوابدار کي گرفتار ڪيو ويو آهي.متاثر خاندان سخت پريشاني ۽ ذهني اذيت جو شڪار آهي ۽ اعليٰ اختيارين کان مطالبو ڪيو آهي ته معاملي جو نوٽيس وٺي فوري طور نياڻي کي بازياب ڪرايو وڃي، ايف آئي آر کي سنجيده نوعيت ۾ تبديل ڪري شفاف جاچ ڪئي وڃي، جيئن حقيقتون سامهون اچي سگهن ۽ انصاف يقيني بڻجي سگهي.