ملير: ٽرڪ ۽ وين ۾ خوفناڪ ٽڪر، ٻارڙي سميت 2 ڄڻا فوت، 5 زخمي

ملير (رپورٽ: عبدالرشيد مورجھريو)ملير لنڪ روڊ لڳ سپرهائي وي تي ٽرڪ ۽ هائي ايس وين جي وچ ۾ خوفناڪ حادثو ٿي پيو جنهن جي نتيجي ۾ 9 ورهين جي ٻارڙي سميت ٻه ڄڻا فوت جڏهن ته پنج ڄڻا سخت زخمي ٿي پيا. اطلاعن موجب حادثو تيز رفتاري سبب پيش آيو، جتي هائي ايس وين ۽ ٽرڪ آمهون سامهون ٽڪرائجي ويا. ٽڪر ايترو شديد هو جو هائي ايس وين کي سخت نقصان رسيو ۽ اندر ويٺل مسافر زخمي ٿي پيا.واقعي جي اطلاع ملڻ شرط پوليس ۽ ريسڪيو ٽيمون فوري طور واقعي واري هنڌ پهچي ويون. فوتين جا لاش ضروري قانوني ڪارروائي لاءِ ۽ زخمين کي علاج لاءِ ايمبولينس ذريعي بقائي اسپتال ٽول پلازا منتقل ڪيو ويو، جتي زخمين کي طبي امداد ڏني پئي وڃي، جڏهن ته ڪجهه زخمين جي حالت ڳڻتي جوڳي ٻڌائي وڃي ٿي.پوليس موجب حادثي ۾ فوت ٿي ويلن جي سڃاڻپ 9 ورهين جي ناهيد ڌي محمد نويد ۽ 55 ورهين جي خليل احمد جي نالن سان ٿي آهي. جڏهن ته زخمين ۾ نوشين، مريم، امبرين، حسن ۽ محمد دائود شامل آهن. پوليس وڌيڪ ٻڌايو ته واقعي بعد ٽرڪ ۽ هائي ايس وين جا ٻئي ڊرائيور موقعي تان فرار ٿي ويا، جڏهن ته ٻنهي گاڏين کي تحويل ۾ وٺي لاڳاپيل ٿاڻي تي منتقل ڪيو ويو آهي. حادثي بابت وڌيڪ جاچ جاري آهي ۽ فرار ٿيل ڊرائيورن جي ڳولا لاءِ ڪوششون تيز ڪيون ويون آهن.شهري حلقن ملير لنڪ روڊ تي وڌندڙ ٽريفڪ حادثن تي ڳڻتي ظاهر ڪندي انتظاميه کان مطالبو ڪيو آهي ته روڊ تي رفتار تي ضابطو آندو وڃي ۽ حفاظتي قدم کنيا وڃن ته جيئن قيمتي جانيون بچائي سگهجن.