ڏوڪري ۾ به ايڪتا ڏهاڙو شاندار نموني ملهايو ويو، ريليون ۽ تقريبون منعقد

ايڪتا ڏهاڙي جي مک تقريب ڏوڪري پريس ڪلب تي ٿي، ٽائون چيئرمين عبدالحميد جيسر ۽ ٻين جي شرڪت

ڏوڪري (اطهر ميمڻ) ڏوڪريءَ ۾ سنڌي ميڊيا جي 7 ڊسمبر تي ثقافتي ڏهاڙي جي موقعي تي ڏوڪري پريس ڪلب، نوجوان سماجي اتحاد، جسقم سميت سياسي سماجي تنظيمن ۽ شھرين طرفان سنڌي ٽوپي اجرڪ پائي بينر ۽ پلي ڪارڊ کڻي ريليون ڪڍيون ويون. ڏوڪري ۾ ثقافتي ڏھاڙي جي مناسبت سان مکيا تقريب ڏوڪري پريس ڪلب طرفان ڪوٺائي وئي، جنهن ۾ ٽائون چيئرمين عبدالحميد جيسر، عبدالقدير جيسر، فرحان ميراڻي، بشير سولنگي، ارشاد ٻگھيو، رڪ سنڌي، سيد جمن شاھ، قاضي بلاول، ظھير بسمل سميت شھرين وڏي انگ ۾ شرڪت ڪئي. ان موقعي تي خطاب ڪندي اڳواڻن چيو ته سنڌ جي ثقافت ھزارين سال قديم آھن، سنڌو ماٿري ئي ننڍي کنڊ جي تھذيبن جي ماءُ آھي، زندہ قومون پنهنجي ثقافت سان بي انتھا محبت ڪنديون آھن، پاڪستان سنڌو ماٿري جي تھذيب جي بنياد تي وجود ۾ آيل آھي، جنھن ۾ چارئي صوبا سنڌو سڀيتا جو عڪس آھن. مکيه تقريب ۾ مبارڪ چانڊيو، اصغر سمون قومي گيت ڳائي شھرين کي جهومائي ڇڏيو. ٻئي طرف جسقم، سنڌي ادبي سنگت، نوجوان سماجي اتحاد پاران رڪ سنڌي، ارشاد کوهارو،ارشاد ٻگھيو،خورشيد ٻگهيو،عمير جوڻيجو،ظهير بسمل جي اڳواڻي ۾ ڌار ڌار ثقافتي ريليون ڪڍيون ويون.