ننگرپارڪر ۾ قومي عوامي تحريڪ ۽ سنڌياڻي تحريڪ پاران اڄ 27هين ترميم ۽ سنڌ دشمن منصوبن خلاف پيادل مارچ ڪرندو

حيدرآباد/ننگر پارڪر: قومي عوامي تحريڪ ۽ سنڌياڻي تحريڪ پاران سڀاڻي (اڄ) 27 ھين آئيني ترميم ۽ سنڌ دشمن منصوبن خلاف قومي عوامي تحريڪ جي سربراھ اياز لطيف پليجو جي اڳواڻي ۾ ننگر پارڪر ۾ ھزارين ماڻهن جو پيادل مارچ ۽ جلسي عام ڪيو ويندو. ھوڏانھن اياز لطيف پليجي چيو آھي تہ ڌرتيءَ، درياء، وسيلن ۽ انقلابن جا فيصلا ڪورٽن ۽ اسٽڊي آڊرن سان نہ جدوجهد ۽ ميدانن ۾ مقابلن سان ڪبا آھن. سنڌ دوکن ۽ اٽڪلن کي رد ڪري ٿي. توھان ڏاڍ جبر ذريعي اسان سنڌين جو وطن، پاڻي، زمينون ۽ وسيلا کسيندا تہ اسان مزاحمت ڪنداسين. اياز لطيف پليجي چيو تہ نواز ليگ ۽ پيپلزپارٽي نئين ترميم ذريعي سنڌ جي وحدت تي حملو ڪري سنڌي ماڻهن جي حق حاڪميت ختم ڪرڻ چاهين ٿا. ڪرپٽ، عوام دشمن ۽ چور حڪمرانن سنڌ کي شامي غريبا بڻائي ڇڏيو آهي. پيپلزپارٽي وزيراعظم جي ڪرسي حاصل ڪرڻ لاءِ سنڌ جي انچ انچ کي نيلام ڪرڻ چاهي ٿي. اياز لطيف پليجي چيو تہ نواز ليگ، پيپلزپارٽي ۽ ٻين سنڌ دشمن قوتن کي سنڌي ڏٺي نٿا وڻن. سنڌين مان سخت بيزار آهن. ھنن جو وس پڄي تہ ست ڪروڙ سنڌي ھجن ائين نہ رڳو زمين، درياھ، ڪوئلو، پيٽرول، گئس سمنڊ ماربل ھجي جنهن کي اسان مالي غنيمت سمجهي لٽيون ڦريون پر بدقسمتي سان سنڌي آھن ست ڪروڙ، تنھن ڪري پيپلزپارٽي، نواز ليگ، سنڌ دشمن قوتون ۽ وفاقي حڪومت لوھ ٿي وئي آهي۔ ست ڪروڑ سنڌين کي ڪيڏانهن ڪن، انهن لاءِ سازشون ۽ اٽڪلون ڪن پيا. پر ست ڪروڙ سنڌي سازشن کي پر امن جدوجهد ذريعي ناڪام بڻائيندا. اياز لطيف پليجي چيو تہ ڪرپٽ حڪمرانو توھانکي غلط فھمي آھي تہ سڄي سنڌ ڪا حڪمران وڏيرن، سردارن، مرشدن، وزيرن، ڪامورن ۽ کرب پتين وانگر ھيڻي، موقعي پرست ۽ ڀاڙي آھي، سنڌ جي پورھيتن ۽ ھيٺين وچولي طبقي جو ٻچو ٻچو پنھنجي وطن، پاڻي ۽ وسيلن لاءِ آخري گھڙي ۽ آخري فتح تائين وڙھندو.