شڪارپور ۾ صحافي گوگي رام عرف ديوان چند سان مبينا فراڊ خلاف احتجاجي مظاهرو

مهيش ڪمار موبائيل ايپ ذريعي اڪائونٽ مان 19 لک رپيا فراڊ ذريعي ڪڍرايا آهن: گوگي رام

شڪارپور (احسان ابڙو) صحافي گوگي رام عرف ديوان چند سان ٿيل فراڊ خلاف شهرين ۽ صحافين پاران لکي غلام شاهہ پريس ڪلب آڏو احتجاجي مظاهرو ڪيو ويو، جنهن بعد هڪ هنگامي پريس ڪانفرنس پڻ منعقد ڪئي وئي۔ شرڪت ڪندڙن صحافي سان ٿيندڙ زيادتي جي سخت لفظن ۾ مذمت ڪندي اعليٰ اختيارين کان فوري نوٽيس وٺڻ جو مطالبو ڪيو پريس ڪانفرنس دوران صحافي گوگي رام دانهون ڪندي الزام هنيو ته سندس ڪيمرا مين مهيش ڪمار موبائيل ايپ ذريعي سندس ايڇ بي ايل بئنڪ اڪائونٽ مان 19 لک روپيا فراڊ ذريعي ڪڍرائي ورتا آهن۔ هن چيو ته اها رقم هن جي رٽائرمينٽ سڄي زندگي جي ڪمائي هئي، جيڪا لاپرواهي سان لٽي وئي، پر اڃا تائين جوابدار خلاف ڪا به اثرائتي ڪارروائي نه ٿي آهي۔ گوگي رام مطالبو ڪيو ته سنڌ جي آءِ جي غلام نبي ميمڻ، ڊي آءِ جي لاڙڪاڻو ناصر آفتاب پٺاڻ، ۽ ايس ايس پي شڪارپور شاهزيب چاچڙ واقعي جو نوٽيس وٺي جوابدارن خلاف قانوني قدم کڻي کيس انصاف فراهم ڪن مظاهرين ۾ بئريسٽر ٽيم ضلع شڪارپور جو انفارميشن سيڪريٽري عبدالحق سيٺار،حافظ رحيم بخش مهر، سماجي اڳواڻ مولابخش ميمڻ، مختيار احمد ميمڻ، صحافي زخمي رشيد مهر، محمد عثمان ڀنڀرو، عبدالرزاق بروهي، ياسين مهر، هدايت الله مهر، فهيم حيدر منگي، زيب جوکيو، فراز ميمڻ ۽ ٻيا شهرين وڏي انگ ۾ شرڪت ڪئي جتي ھنن چيو ته صحافي سماج جو اک ۽ آواز آهن، ۽ جيڪڏهن کين ئي تحفظ نه ملندو ته صحافت جو وقار مجروح ٿيندو۔ هنن فوري طور جوابدار مهيش ڪمار ۽ سندس ساٿين جي گرفتاري جو مطالبو ڪندي چيو ته متاثر صحافي سان انصاف ڪيو وڃي، ٻي صورت ۾ احتجاج جو سلسلو وڌايو ويندو۔