ڪيسن کان نٿا ڊڄون، سنڌ کي ٽوڙڻ نه ڏينداسين, 7ڪروڙ سنڌين جو سنڌياڻي تحريڪ جي باشعور ڀينرن ۾ ساهه آهي: وسند ٿري

ضيائي مارشل لا دوران ڪابه سنڌياڻي معافي وٺي جيل مان نه موٽي هئي. رسول بخش پليجو 8 سال کان وڌيڪ جيل ۾ رهيو

مٺي (رپورٽر)عوامي تحريڪ جي مرڪزي صدر ايڊووڪيٽ وسند ٿري ، اوڀايو جوڻيجو ، ديال صحرائي ۽ ٻين مٺي ۾ پريس ڪانفرنس ڪندي چيو آهي ته حڪومت 27هين ترميم پاس ڪري آمريت کي مڙهيو آهي ۽ ھاڻي 28هين ترميم آڻي سنڌ کي ٽڪرا ٽڪرا ڪرڻ جي سازش ڪئي پئي وڃي پر سنڌي قوم اها سازش ڪامياب ٿيڻ نه ڏيندي. حڪومت کي 27هين آئيني ترميم، بورڊ آف انويسٽمينٽ اميڊمينٽ ايڪٽ، پيڪا امينڊمينٽ سميت سمورا ڪارا قانون ختم ڪرڻا پوندا.هن چيو ته اسين ڪيسن کان نٿا ڊڄون، پوليس جعلي ڪيس ڪري رهي آھي. سنڌ پوليس بوکلاهٽ جو شڪار ٿي وئي آهي سنڌياڻي تحريڪ جي بهادر ڀينرن جي وطن جي حفاظت وارن نعرن جي للڪار سان پوليس لٺين ۽ بندوقن سميت ڀڄي وئي، سنڌياڻي تحريڪ پنهنجو پرامن احتجاج ڀرپور نموني سان رڪارڊ ڪرايو ڪو به ماڻهو جيلن ۽ ٿاڻن کان نٿو ڊڄي. پنهنجي ڌرتيءَ جي حفاظت لاءِ جيلن ۾ وڃڻ لاءِ اسين موجود آهيون ڀلي گرفتار ڪريو ۽ ريلي ۾ 500 ماڻهو نه پر 10 هزار کان وڌيڪ هئا، ست ڪروڙ سنڌين جو سنڌياڻي تحريڪ جي باشعور ڀينرن ۾ ساهه آهي. هن چيو ته اسان اڳ ۾ به جيل ڀريو تحريڪون هلايون آهن، هاڻي به تيار آهيون، ضيائي مارشل لا دوران ڪابه سنڌياڻي معافي وٺي جيل مان نه موٽي هئي. رسول بخش پليجو 8 سال کان وڌيڪ جيل ۾ رهيو، عوامي تحريڪ ۽ سنڌياڻي تحريڪ جي ڪارڪنن کي جيلن ۽ ٿاڻن جي پرواهه ناهي، هن چيو ته سنڌ ڌرتي ز۽ سنڌو درياهه جي حفاظت اسان جي اولين ترجيع آهي، ان لاءِ اسين هر وقت هر گهڙي مصيبتن کي منهن ڏيڻ لاءِ تيار آهيون. سنڌياڻي تحريڪ تي ڪنهن به نام نهاد جمهوري توڙي آمريتي دور ۾ ايف آئي آر نه ڪٽي آهي، جنرل پرويز مشرف جي دور ۾ سموري سنڌ ۾ سنڌياڻي تحريڪ احتجاج ڪيا پر ڪابه ايف آئي آر نه ٿي. بلاول طرفان سنڌياڻي تحريڪ جي ڀينرن تي ايف آئي آر ڪٽڻ جي عمل ثابت ڪيو آهي ته هي بلاول زرداري جي نام نهاد جمهوري حڪومت اها ماضي جي سمورين آمريتن کان وڌيڪ بدترين آمريت آهي. بلاول زرداري پنهنجي حڪومت هوندي پنهنجي ماءُ جي قاتلن کي سزا نه ڏياري سگهيو، ان حڪومت طرفان سنڌ جي نياڻين مٿان ڪوڙا ڪيس ڪرڻ کانسواءِ ٻي ڪهڙي اميد ڪري سگهجي ٿي. هن چيپ ته هي سمجهن ٿا ته اسان جي مائرن ۽ ڀينرن تي ڪيس داخل ڪري سنڌ کي ٽڪرا ٽڪرا ڪندا ۽ سنڌ جي شهرن کي ايم ڪيو ايم جي دهشتگردن حوالي ڪندا ته ڪير به نه ڪڇندو پر انهن جي جي ڀُل آهي. سنڌ جو ٻچو ٻچو سنڌ جي وحدت، وجود ۽ وسيلن جي حفاظت لاءِ جدوجهد ڪندو. سنڌي قوم جي تاريخ رهي آهي ته سنڌي قوم سدائين پنهنجي ڌرتيءَ لاءِ ويڙهه ڪئي آهي، اسين پنهنجي ڪارونجهر، ڪاڇي، گورک، کير ٿر، ٻيٽن سميت سنڌ جي انچ انچ جي حفاظت ڪنداسين، ڪارپوريٽ فارمنگ ذريعي ڪمپنين کي الاٽ ڪيل زمينن جي واپسي تائين سک جو ساهه نه کڻنداسين. تيل، ڪوئلي ۽ گئس تي به ڪمپنين جو قبضو ختم ڪرائڻ لاءِ جدوجهد جاري رهندي. وسند ٿري وڌيڪ چيو ته پيپلز پارٽي روٽي ڪپڙا ۽ مڪان جو نعرو ڏئي ٽئي شيون عوام کان ڦري ڇڏيون آھن. جمهوريت جمهوريت جو راڳ آلاپيندڙ پيپلز پارٽي جمهوريت جو قتل ڪري بدترين آمريت ڇڏي آهي. وسند ٿري وڌيڪ چيو ته 27 هين آئيني ترميم، امڪاني 28هين ترميم وسيلي سنڌ کي ٽڪرا ڪرڻ جي سازش، ڪارپوريٽ فارمنگ، ڪئنالن، معدني وسيلن تي ڌاڙن، قبيلائي دهشتگردي، ڪارو ڪاري ۽ عورتن جي قتلن خلاف 21 ڊسمبر تي لاڙڪاڻي ۾ هزارين ڀينرن ۽ ڀائرن جو احتجاج ڪيو ويندو. وسند ٿري وڌيڪ چيو ته آئين چئي ٿو سمورا شهري برابر آهن، 27هين ترميم چئي ٿي حڪمران بالا آهن، جن تي ڪا به عدالتي ڪاروائي نه ٿيندي چند حڪمرانن کي احتساب کان ڇوٽ ڏئي آئين معطل ڪيو ويو آهي، اسين آئين جي بالادستي لاءِ پرامن جمهوري جدوجهد هر صورت ۾ جاري رکنداسين.