اسٽيل ملز جي ملازمن تي تشدد ۽ ڪيسن خلاف قومي اسيمبلي ۾ به پڙاڏو

ڄام عبدالڪريم بجار جوکيو گلشن حديد ۾ پاڻي بندش ۽ ايف آءِ آرز خلاف سخت احتجاج

اسلام آباد / ملير (رپورٽ: عبدالرشيد مور) پاڪستان پيپلز پارٽي جي اڳواڻ، قومي اسيمبلي جي ميمبر ۽ چيئرمين سوشل ويلفيئر ضلعو ملير سردار جام عبدالڪريم بجار جوکيو قومي اسيمبلي جي اجلاس دوران پنهنجي تڪ گلشن حدید ۾ گذريل چار مهينن کان جاري پاڻي جي بندش ۽ اسٽيل ملز جي مظلوم مزدورن تي مبينا تشدد ۽ ڪيسن جي داخل ٿيڻ خلاف سخت احتجاج ڪيو سردار جام عبدالڪريم پنهنجي تقرير ۾ چيو ته گلشن حدید ۽ اسٽيل ٽائون جا رهاڪو پاڻي، بجلي ۽ بنيادي سهولتن کان محروم آهن، جڏهن ته احتجاج ڪندڙ محنتڪش ۽ پيپلز پارٽي جا مقامي اڳواڻن تي ڪوڙا ايف آءِ آر داخل ڪيا پيا وڃن، جيڪو افسوسناڪ ۽ مذمت جوڳو عمل آهي اُنهن قومي اسيمبلي ۾ مطالبو ڪيو ته گلشن حدید جو پاڻي فوري طور بحال ڪيو وڃي، اسٽيل ملز مان برطرف ٿيل ملازمن کي سندن واجبات ادا ڪيا وڃن ۽ پُرامن احتجاج ڪندڙ مزدورن خلاف داخل ڪيل ڪيس فوري طور واپس ورتا وڃن سردار جام عبدالڪريم وڌيڪ چيو ته پيپلز پارٽي هميشه مزدور دوست پارٽي رهي آهي، تنهن ڪري اهڙا قدم پارٽي جي منشور ۽ عوامي خدمت جي اصولن جي خلاف آهن۔ هن سنڌ جي وڏي وزير ۽ وفاقي وزارتِ صنعت و پيداوار کان مطالبو ڪيو ته اسٽيل ملز جي مسئلي کي ترجيحي بنيادن تي حل ڪيو وڃي ۽ مظلوم مزدورن کي انصاف فراهم ڪيو وڃي۔هن خبردار ڪيو ته جيڪڏهن پاڻي جي فراهمي بحال نه ڪئي وئي ۽ مزدورن تي ظلم جو سلسلو بند نه ٿيو ته هو اسيمبلي جي اندر ۽ ٻاهر احتجاجي مهم کي وڌيڪ وسيع ڪندو۔