27هين آئيني ترميم ملڪ ۾ ننگي ڊڪٽيٽرشپ جو اعلان آهي: وسند ٿري

عدليا کي قيد ڪري ملڪ ۾ عوام جا بنيادي جمهوري ۽ آئيني حق معطل ڪيا ويا آهن: عوامي تحريڪ جو صدر

ملير (عبدالرشيد مورجھريو) عوامي تحريڪ جي مرڪزي صدرايڊووڪيٽ وسند ٿري چيو آهي ته ستاويهن (27هين) آئيني ترميم وسيلي سپريم ڪورٽ کي رٻڙ اسٽيمپ بڻايو ويو آهي ۽ ان جا اختيار محدود ڪري وفاقي آئيني ڪورٽ ٺاهي عدليا تي راتاهو هنيو پيو وڃي۔ هن چيو ته عدليا کي قيد ڪري ملڪ ۾ عوام جا بنيادي جمهوري ۽ آئيني حق معطل ڪيا ويا آهن، جيڪا عملداري قائداعظم محمد علي جناح جي پاڪستان جي فڪر ۽ اصولن جي قتل برابر آهي۔هو گذريل ڏينهن عوامي پريس ڪلب ملير ۾ پروگرام “ميت دي پريس” ۾ مرڪزي ميڊيا سيڪريٽري ڪاشف ملاح، ڪراچي ڊويزن سيڪريٽري ايڊووڪيٽ عبدالله ٻپڙ، ملير ضلعي صدر پرهه سومرو، علي محمد ڪلمتي ۽ ٻين سان گڏ ڳالهائي رهيو هو۔وسند ٿري چيو ته 27هين آئيني ترميم بدترين جمهوريت جو چهرو وائکو ڪري ڇڏيو آهي ۽ ننگي ڊڪٽيٽرشپ کي آئيني شڪل ڏني وئي آهي۔ حڪمران پاڻ کي احتساب کان مٿانهون بڻائي بادشاهي نظام قائم ڪرڻ چاهين ٿا، جتي ڪرپٽ حڪمرانن کان به پڇاڻو نه ٿيندو هن چيو ته عدليا کي آئين جو تحفظ ڪرڻ گهرجي، وڪيل برادري کي 27هين آئيني ترميم خلاف جدوجهد ڪري عدليا کي بچائڻ لاءِ اڳتي اچڻ گهرجي، ڇو ته تاريخ سپريم ڪورٽ کي پنهنجي ماضي جا داغ ڌوئڻ جو موقعو ڏئي رهي آهي عوامي تحريڪ جي اڳواڻن چيو ته حڪمران پارٽيون پيپلز پارٽي ۽ نواز ليگ فارم 47 وارن اسيمبلي ميمبرن وسيلي زوري زبردستي 27هين ترميم منظور ڪرائڻ چاهين ٿيون، جيئن بدترين مارشل لا کي اسيمبلين وسيلي قانوني شڪل ڏئي سگهجي اڳواڻن وڌيڪ چيو ته شهباز شريف ۽ بلاول ڀٽو زرداري ملڪ ۾ بدترين مارشل لا حڪمراني جو مثال قائم ڪري ڇڏيو آهي، جن جي بدانتظامي ۽ اقتدار جي حرص سبب جمهوريت جو جنازو ڪڍي ڇڏيو ويو آهي ان موقعي تي اقبال جروار، عزيز لانگاهه، ڊاڪٽر رحمت الله بروهي، امر مگسي، مير نوروز ڪلمتي، محمد علي ساهڙ ۽ ٻيا اڳواڻ پڻ موجود هئا،