ملير جي ڪونڪر ندي ۾ هڪ ئي گهر جي 4 ڀاتين سميت 8 ڄڻا ٻڏي ويا، 2 لاش هٿ، 6 جي ڳولا جاري

ندي ۾ ٻڏي ويلن ۾ گلاب ڀيل، سندس گهر واري، ڪيلاش ڀيل، نارو ڀيل، اقبال لاسي، فرحان ترين، جاويد ۽ افضل جوکيو شامل

ملير (رپورٽ: عبدالرشيد مورجھريو) ملير ۾ برساتن سبب ندين جي وهي اچڻ سان ۽ اٿلڻ انساني جانين سميت تمام وڏو نقصان ٿيو آهي برسات جي مسلسل وساري سبب ڪونڪر ندي ۾ انتهائي ڏکوئيدڙ حادثو پيش آيو جتي هڪ ئي گهر جا 4 ڀاتي، زال، مڙس، پٽ ۽ پوٽي سميت ڪل 8 ڄڻا ٻڏي ويا. حادثي سبب علائقي ۾ سوڳ ڇانيل آهي ۽ ڳوٺاڻن ۾ ڏک ۽ ڪاوڙ جي لهر پکڙيل آهي ٻڏڻدڙن ۾ گلاب ڀيل، سندس گهر واري، ڪيلاش ڀيل، نارو ڀيل، اقبال لاسي، فرحان ترين، جاويد ۽ افضل جوکيو شامل آهن. مقامي ماڻهن جي مدد سان تاحال جاويد ۽ گلاب ڀيل جي گهر واري جا لاش هٿ آيا آهن، جڏهن ته باقي 6 ڄڻن جي ڳولا اڃا تائين جاري آهي اتي موجود ماڻهن موجب حادثي وقت انتظاميا نه ڪو بروقت اطلاع ڏنو ۽ نه ئي ڪو فوري ريسڪيو آپريشن شروع ڪيو جنهن سبب قيمتي انساني زندگيون ضايع ٿي ويون. ڳوٺاڻن ۽ متاثر خاندانن جو چوڻ آهي ته جيڪڏهن وقت سر ريسڪيو ٽيم پهچي وڃي ها ته ڪيترن ئي جاني نقصانن کان بچي سگهجي پيو.وارثن دانهون ڏيندي چيو آهي ته حڪومت ۽ انتظاميا جي غفلت سبب هنن پنهنجا پيارا وڃايا آهن. هنن مطالبو ڪيو آهي ته فوري طور تي باقي لاشن جي ڳولا لاءِ وڏو آپريشن شروع ڪيو وڃي، متاثر خاندانن جي مالي سهائتا ڪئي وڃي ۽ ذميوارن کي قانون جي ڪٽهڙي ۾ آندو وڃي.هن حادثي سان سڄي علائقي ۾ سوڳ ۽ ڏک جو ماحول ڇانيل آهي، جڏهن ته مقامي ماڻهن جو چوڻ آهي ته برساتن دوران حفاظتي اپاءُ نه وٺڻ ۽ بروقت اطلاع نه ڏيڻ ئي انساني الميي جو اصل سبب بڻيا.