ملير: مراد ميمڻ يوسي ۾ گٽر اٿلي پيا، گهٽيون روڊ پاڻي هيٺ، شهري پريشان

مختلف علائقن ۾ گٽرن جو پاڻي تلاءَ جي شڪل ۾ بيٺل

ملير(رپورٽ: عبدالرشيد مورجھريو) ملير جي مراد ميمڻ يوسي جي بلوچ محله، غفور بستي ۽ ٻين علائقن ۾ گٽرن جو گندو پاڻي گڏ ٿيڻ ڪري رهواسي سخت تڪليفن ۾ مبتلا ٿي ويا آهن. گندگي، بدبوءِ ۽ وائرس سبب ڪيترائي معصوم ماڻهو موذي بيمارين ۾ مبتلا ٿي چڪا آهن، جڏهن ته علائقي ۾ آمد و رفت جو به وڏو مسئلو پيدا ٿي ويو آهي.علائقي واسين جو چوڻ آهي ته مکيه روڊ گٽر جي آلوده پاڻي سان ڀرجي ويو آهي، جنهن سبب ٻار، عورتون ۽ بزرگ روزانو ساڳئي پاڻي مان گذري اسڪولن، مسجدن، اسپتالن ۽ مارڪيٽن تائين وڃڻ تي مجبور آهن. ان سان گڏ ايمبولينس ۽ گاڏيون به علائقي ۾ داخل نٿيون ٿي سگهن، جنهن ڪري زندگيون خطري ۾ آهن رهواسين جو چوڻ آهي ته ڪيترن ئي سالن کان اهي شڪايتون ڪري رهيا آهن، پر ملير جي چونڊيل نمائندي ايم اين اي سردار جام عبدالڪريم جوکيو طرفان ڪا به خاص دلچسپي نه ڏيکاري وئي آهي. سندن خاموشي ۽ لاتعلقي علائقي جي عوام سان سراسر ناانصافي ۽ زيادتي آهي رهواسين جو وڌيڪ چوڻ هو ته گٽرن جو پاڻي هاڻي تلاءَ جي شڪل اختيار ڪري ويو آهي، پر نه صفائي ٿي رهي آهي ۽ نه ئي نيڪال جو ڪو بندوبست ڪيو ويو آهي. نتيجي ۾ ماڻهن ۾ مايوسي ۽ محرومي وڌي رهي آهي علائقي جي ماڻهن ايم اين اي سردار جام عبدالڪريم کان پرزور مطالبو ڪيو آهي ته فوري طور تي پبلڪ هيلٿ ڊپارٽمينٽ جي ايم ڊي، چيف انجنيئر ۽ ايڪسئن کي معطل ڪري، ۽ بلوچ محله، غفور بستي، نعمٽ وليج، ڦنور محله، جام بستي، مگسي محله، جاموٽ محله سميت سمورن علائقن جي ماڻهن تي ترس کڻي مسئلو حل ڪرڻ لاءِ قدم کنيا وڃن