ڏوڪري ۾ پورهيت جو بااثرن خلاف احتجاج، ڀتو گهرن جا الزام

ڏوڪري(اطهر ميمڻ) درگاهه محلہ باڊھ جي رهواسي جو ڏوڪري پريس ڪلب آڏو بااثرن خلاف احتجاج، بااثر ڪيس تان هٿ کڻڻ لاءِ ڌمڪيون ڏئي رهيا آهن، اسان مٿان الزام اجايا آهن، باڊه پوليس. تفصيل موجب گذريل ڏينهن باڊه واسي جو ڏوڪري پريس ڪلب آڏو احتجاج، باڊه واسي امداد جت عرف غلام شبير جت دانهيندي چيو ته منهنجي مامي جو پٽ غلام مرتضي جت مانڊيء تي ٻاراڻيون شيون وڪرو ڪري گهر جو گذر سفر ڪندو آهي،سندس کان بااثر پپو بروهي، جميل بروهي، امجد بروهي، يوسف بروهي ۽ ٻيا مانڊيء تي اچي کانئس زوري ڀتو وٺڻ لاءِ کيس گار گند ڪري هيسائي رهيا آهن ۽ کيس چون ٿا ته اسان کي ڀتو ڏئي نه ته هتي توکي مانڊي رکڻ نه ڏينداسين، ڀتو نه ڏيڻ تي هنن اسان مٿان لتن ۽ مڪن سان وسڪارو ڪري سخت زخمي ڪري مانڊي ۽ مانڊيء ۾ پيل ٻاراڻي سامان جو به نقصان ڪري ويا آهن، بااثرن جي اهڙي ڪارروائي خلاف اسان باڊھ ٿاڻي تي اين سي داخل ڪرائي هئي ، مخالف ڌر جا ماڻهو بااثر آهن، مخالفن جي وانگار وهندي باڊھ پوليس اسان کي لاڪ اپ ڪري ڇڏيو هو ، اسان ڊي آئي جي لاڙڪاڻو، ايس ايس پي لاڙڪاڻو سميت ٻين وس وارن کي اپيل ٿا ڪريون ته اسان سان انصاف ڪيو وڃي، هوڏانهن باڊه پوليس جو چوڻ آهي ته ٻنهي ڌرين جو پاڻ ۾ معمولي ڳالھ تان منهن ماري ٿي هئي اسان ڪنھن جي به ڌر نه آهيون، اسان مٿان الزام اجايا آهن.