ٺٽو: مڪلي تي پ پ ڪلچرل ونگ ضلعي جي نون عهديدارن جي مان ۾ آجياڻو

روزي خان دراني، شهزاد سومرو، حيدر ڀٽي ۽ ٻيا حاجي اسد خشڪ جي آجياڻي ۾ شريڪ

ٺٽو( شفيق ڀٽي) مڪلي جي خشڪ برادري جي معزز حاجي اسد خشڪ پاران پاڪستان پيپلز پارٽي ڪلچرل ونگ ضلعي ٺٽي جي نئين مقرر ٿيل عهديدارن ضلعي صدر روزي خان دراني، جنرل سيڪريٽري سردار شهزاد سومرو، اطلاعات سيڪريٽري حيدر علي ڀٽي ۽ ٻين جي مان ۾ پنهنجي رهائشگاهه خشڪ هائوس هاشم آباد سوسائٽي مڪلي ۾ آجياڻو ڏنو ويو، جنھن ۾ حاجي اسد خشڪ، مشتاق گرماڻي، قومپرست اڳواڻ ارشد خشڪ، آصف خشڪ، سيف علي خشڪ ۽ ٻين پاران پي پي پي ڪلچرل ونگ جي نئين مقرر ٿيل عهديدارن روزي خان دراني، سردار شهزاد سومرو، حيدر علي ڀٽي کي سنڌ جي سوکڙي لونگين ۽ اجرڪن جا تحفا پيش ڪيا، ان موقعي تي صدر روزي خان دراني حاجي اسد خشڪ سميت سڀني معززين جو شڪريو ادا ڪندي چيو ته پاڪستان پيپلز پارٽي جي چيئرمين بلاول ڀٽو زرداري ۽ سنڌ جي صدر نثار کهڙو سميت پ پ پ ڪلچر ونگ جي مرڪزي قيادت جيڪو اسانتي اعتماد ڪري اهم ذميواري سونپي اھي، ان کي ايمانداري سان ادا ڪري ضلعي ۾ پيپلز ڪلچرل ونگ کي وڌيڪ مضبوط ڪرڻ لاءِ پنهنجون صلاحيتون استعمال ڪرڻ سان گڏ ثقافت سان لاڳاپيل ھر مسئلي کي حل ڪرڻ لاءِ هر ممڪن ڪوشش ڪنداسين، جنهن ۾ فنڪار، ليکڪ، دانشور ۽ شاعر شامل آهن. روزي خان دراني وڌيڪ چيو ته پيپلز پارٽي هڪ جمهوري پارٽي آهي، جيڪا رنگ ۽ نسل کان سواءِ انسانيت ۽ غريب ماڻهن جي خدمت کي پنهنجو بنيادي مقصد سمجهي ٿي. آخر ۾ خطاب ڪندي حاجي اسد خشڪ چيو تہ ھو روزي خان دراني سميت سندن سمورن عھديدارن جو شڪر گذار آھي، جن وٽس اچي کيس ھيڏو سارو مان ڏنو. ھن سندن ڪاميابي تي نيڪ خواھشن جو پڻ اظھار ڪيوـ ان موقعي تي جميل خشڪ، شبير خشڪ، نور حسن خشڪ ۽ ٻيا پڻ موجود هئا.