ڪنري ۾ وسڪاري دوران خوفزده ٿيل نوجوان فوت، پنج پلي وٽان لاش هٿ

عمرڪوٽ (ڊ ر) عمرڪوٽ جي تعلقي ڪنري جي علائقي پنج پلي وٽان هٿ آيل نوجوان جي لاش جي سڃاڻپ ٿي وئي، پوليس موجب فوت ٿيل نوجوان جو نالو عاقب راجپوت آهي، جيڪو امير آباد عمرڪوٽ جو رهواسي هو ۽ مقامي هوٽل تي باورچي طور ڪم ڪندو هو، پوليس ذريعن موجب هي افسوسناڪ واقعو تيز برسات دوران پيش آيو، جڏهن ته گجگوڙ ۽ کنوڻ جي زور سان نوجوان خوفزده ٿي بيهوش ٿي پيو ۽ بعد ۾ دل جي دوري سبب هارٽ فيل ٿي ويو جنھن سبب فوت واقع ٿيو، پوليس نوجوان جي لاش ضروري ڪارروائي بعد وارثن حوالي ڪري ڇڏي، جڏهن ته واقعي بابت وڌيڪَ جاچ جاري آهي، نوجوان جي اوچتي فوتگي تي علائقي واسين ۾ افسوس جي لهر ڇانئجي وئي، جڏهن ته وارث سخت ڏک ۾ مبتلا آهن، علائقي ۾ وسڪاري سان گڏ وڌندڙ کنوڻ ۽ گجگوڙ وارن واقعن سبب عوام ۾ خوف ۽ ڳڻتي جي فضا قائم آهي، سماجي حلقن واسطيدار ادارن کان مطالبو ڪيو آهي ته موسم جي شدت دوران احتياطي اپائن بابت عوامي آگاهي مهم هلائي وڃي، ته جيئن اهڙن افسوسناڪ واقعن کان بچي سگهجي.