ٺٽي ۾ ڇتو چنڊ واسين جو بااثرن جي مبينا حملي خلاف احتجاج

عمران جاکرو ۽ اختر جاکرو هٿيارن ۽ لوهي سرين سان حملو ڪيو: حنيف سمون

ٺٽو (محمد شفيق ڀٽي) ڇتوچنڊ جي رهواسي نوجوانن حنيف سمون ء فيض محمد سمون پنهنجي والد بچل سمون سان گڏ عوامي پريس ڪلب ٺٽو پهچي پريس ڪانفرنس ڪندي چيو آهي ته ڇتوچنڊ ۾ سندن برگر جو دڪان آهي، جتي ڪجهه ڏينهن اڳ علائقي جا اوباش نوجوان عمران ولد غلام رسول جاکرو ۽ اختر ولد اسلم جاکرو هٿيارن ۽ لوهي سرين سان حملو ڪيو، جنهن دوران هو سخت زخمي ٿي پيو ۽ سندس ٻانهن ڀڄي پئي.هن ٻڌايو ته واقعي جي ايف آئي آر ٺٽو ٿاڻي تي داخل ڪئي وئي، پر پوليس جوابدارن کي بااثر ھئڻ سبب گرفتار نٿي ڪري. نتيجي طور جوابدار سرعام گهمي رهيا آهن ۽ هڪ ڀيرو ٻيهر کين موتمار ڌمڪيون ڏئي رهيا آهن.متاثر نوجوانن جي والد بچل سمون، جيڪو موچي جو ڪم ڪري روزگار ڪندو آھي تنھن چيو ته هو غريب ماڻهو آهن، محنت مزدوري ڪري گذر سفر ڪن ٿا، پر جوابدار بااثر هجڻ سبب کين ڪيس تان هٿ کڻڻ لاءِ دٻاءُ ۽ ڌمڪيون ڏئي رهيا آهن.هنن ايس ايس پي ٺٽو کان مطالبو ڪيو آهي ته جوابدارن کي فوري طور گرفتار ڪيو وڃي، کين تحفظ فراهم ڪيو وڃي ۽ واقعي ۾ ملوث ماڻهن خلاف سخت قانوني ڪارروائي ڪئي وڃي، ته جيئن اسان غريبن سان انصاف ٿي سگهي.