گجو لڳ ڳوٺ عظا محمد جوکيو ۾ سرڪاري زمين تي قبضي جي ڪوشش، ڳوٺاڻن جو احتجاج

ڊاڪٽر ابراهيم خاصخيلي زبردستي زمين تي ٽريڪٽر ھلائي قبضو ڪري رھيو آھي، نوٽيس ورتو وڃي: مظاهرين

ٺٽو ( شفيق ڀٽي)گجو لڳ ڳوٺ عظا محمد جوکيو ۾ 8 ايڪڙ سرڪاري زمين تي مبينا طور غير قانوني قبضي جي ڪوشش خلاف ڳوٺاڻن پاران سخت احتجاج ڪيو ويو. جاويد جوکيو، شهمير جوکيو ۽ ٻين رهواسين عوامي پريس ڪلب ٺٽو ۾ پريس ڪانفرنس ڪندي الزام ھنيو آهي ته بااثر ڊاڪٽر ابراهيم خاصخيلي زبردستي زمين تي ٽريڪٽر ھلائي قبضو ڪري رھيو آھي.مقامي ماڻهن موجب، مٿين زمين ڪيترن ئي سالن کان سرڪاري ريڪارڊ ۾ ڳوٺ عطا محمد جوکيو جي حد ۾ درج آهن ۽ عوامي استعمال سان گڏ مال جي چراگاهه طور رکيل آهي، پر هاڻي بااثر ماڻهو انهي تي زبردستي قبضو ڪرڻ جي ڪوشش ڪري رهيا آهن.هن معاملي تي سيشن ڪورٽ ٺٽو ۾ ڪيس به هلي رهيو آهي، جنهن جي ٻڌڻي تاريخ 8 آگسٽ 2025 تي هئي، جڏهن ته ايندڙ ٻڌڻي 16 آگسٽ 2025 تي مقرر ڪئي وئي آهي.جاويد جوکيو ۽ شهمير جوکيو جو چوڻ هو ته روينيو کاتي کلي ڪچهري جي انعقاد تائين هن زمين تي ٽريڪٽر هلائڻ تي پابندي جو حڪم نامو جاري ڪيو آهي، پر اڄ سرڪاري موڪل جو فائدو وٺندي، مبينا قبضي ڪندڙ ڌر هٿياربند ماڻهن سان گڏ زمين تي ويهي ٽريڪٽر هلائي رهي آهي.هنن الزام لڳايو ته قبضو ڪندڙ ڌر ھٿ وٺي ڳوٺ جو ماحول خراب ڪري خونريزي ڪرائڻ چاهي ٿي. ھنن چيو ته جيڪڏهن اسان جو ڪو جاني نقصان ٿيو ته ان جي سموري ذميواري زبردستي قبضو ڪندڙ ڌر تي هوندي.انهن ايس ايس پي ٺٽو، ڊي سي ٺٽو ۽ اينٽي ڪرپشن چيئرمين کان مطالبو ڪيو ته قبضي جي ڪوشش ڪندڙن خلاف قانوني ڪارروائي ڪري، زمين کي عوامي استعمال لاءِ فوري طور بحال ڪيو وڃي.