عمرڪوٽ ۾ پوليس اميدوارن جو احتجاج، آفر آرڊر نه ملڻ خلاف شديد نعريبازي

عمرڪوٽ (رپورٽ:ڪانجي مل رکيسر) عمرڪوٽ ۾ سنڌ پوليس ۾ ٽيسٽ پاس ڪندڙ اميدوارن پاران آفر آرڊر نه ملڻ خلاف پريس ڪلب اڳيان زور دار احتجاجي مظاهرو ڪيو ويو، جتي اميدوارن سخت نعريبازي ڪندي اختيارين کان فوري نوٽيس وٺڻ جو مطالبو ڪيو، مظاهري جي اڳواڻي محبوب علي، مير محمد، ڪيلاش ڪولهي، راجيش، رميش ڪمار، لالچند، معشوق علي، روي شنڪر، گلاب، مڪيش ۽ ٻين ڪئي، جن ميڊيا سان ڳالهائيندي چيو ته اسان سنڌ پوليس جون ٽيسٽون قانوني ۽ ميرٽ تحت پاس ڪيون آهن، پر افسوس جو هڪ سال گذرڻ باوجود اڃان تائين آفر آرڊر جاري نه ڪيا ويا آهن، جنهن ڪري اسان سخت ذهني اذيت ۾ مبتلا ٿي ويا آهيون، مظاهرين چيو ته گهرو وزير ضياءُ لنجار پاڻ بيان ڏئي چڪو آهي ته پوليس کاتي ۾ پنجاهه هزار جايون خالي آهن، پر 16 هزار ڪامياب اميدوارن کي گذريل هڪ سال کان انتظار جي عذاب ۾ مبتلا رکيو ويو آهي، جيڪو سراسر ناانصافي آهي، اميدوارن الزام لڳايو ته بار بار احتجاج ڪرڻ باوجود نه ڪي اختياري ٻڌي رهيا آهن، نه ئي ڪير مسئلي جو نوٽيس وٺي رهيو آهي، جيڪا نوجوانن جي حقن سان مذاق آهي، اسين سڀ نوجوان ميرٽ تي لٿل آهيون، تعليم حاصل ڪري مستقبل جي اميدن سان ٽيسٽون پاس ڪيون، پر هاڻي بي روزگاري، بيچيني ۽ نااميدي جو شڪار ٿي ويا آهيون، جڏھن تہ مظاھرين ضلع ڪونسل چيئرمين حاجي بقاء پلي سان سندس آفيس تي ملاقات ڪئي، ان موقعي تي حاجي بقا پلي نوجوانن جي حوصلا افزائي ڪندي چيو تہ توھان جو آواز اعلي ايوانن تائين پھچائيندس، آخر ۾ مظاهرين سنڌ جي وڏي وزير سيد مراد علي شاهه ۽ گهرو وزير ضياءُ لنجار کان مطالبو ڪيو ته معاملي جو فوري نوٽيس وٺي آفر آرڊر جاري ڪيا وڃن ته جيئن نوجوانن جي بيچيني ختم ٿي سگهي ۽ هو باعزت روزگار سان پنهنجو ۽ پنهنجي خاندان جو مستقبل سنواري سگهن.