کراچی: پاکستان کی معزز خاتونِ اوّل اور رکن قومی اسمبلی محترمہ آصفہ بھٹو زرداری نے آج سندھ حکومت کے تحت ادارہ برائے صحتِ اطفال و نومولود (ایس آئی سی ایچ این) کے دو مرکزی اسپتالوں کا تفصیلی سرکاری دورہ کیا۔ ان کے ہمراہ وزیرِ صحت و بہبودِ آبادی سندھ ڈاکٹر عذرا فضل پیچوہو، میئر کراچی بیرسٹر مرتضیٰ وہاب، اور دیگر اہم حکومتی عہدیداران موجود تھے۔
دورے کا آغاز اعظم بستی میں قائم "مدر اینڈ چائلڈ کیئر اسپتال" سے ہوا، جہاں پیپلز پارٹی کراچی ڈویژن کے صدر اور صوبائی وزیرِ بلدیات سعید غنی نے معزز مہمانوں کا پرتپاک خیرمقدم کیا۔ بعد ازاں، وفد نے کورنگی نمبر 5 میں واقع "چلڈرن اسپتال" کا بھی دورہ کیا۔
محترمہ آصفہ بھٹو زرداری نے وفد کے ہمراہ اسپتالوں کے مختلف وارڈز، ایمرجنسی، لیبر رومز، نیونٹالوجی یونٹس اور آؤٹ پیشنٹ ڈیپارٹمنٹس (OPD) کا تفصیلی معائنہ کیا۔ اس موقع پر انہوں نے مریض بچوں کے والدین، موجود عملے اور ڈاکٹروں سے براہِ راست بات چیت کی، ان سے فراہم کی جانے والی طبی سہولیات، عملے کے رویے، صفائی ستھرائی اور مجموعی نظام پر ان کے تاثرات سنے۔
خاتونِ اوّل نے خاص طور پر اس بات پر خوشی کا اظہار کیا کہ سندھ حکومت کے تحت ان اداروں میں نومولود بچوں، شیر خوار بچوں اور بچوں کو عالمی معیار کے مطابق بالکل مفت علاج فراہم کیا جا رہا ہے۔ انہوں نے کہا کہ ادارہ برائے صحتِ اطفال و نومولود (ایس آئی سی ایچ این) کا کام قابلِ ستائش ہے۔ جو والدین یہاں آ رہے ہیں، ان کے لیے مفت اور معیاری علاج کسی نعمت سے کم نہیں۔ یہ اقدام سندھ حکومت کے صحت کے شعبے میں انقلابی ویژن کی غمازی کرتا ہے۔
آصفہ بھٹو زرداری نے مریض بچوں کے والدین سے علیحدہ نشست میں ملاقات بھی کی۔ والدین نے نہ صرف اسپتال کی سہولیات کی تعریف کی بلکہ ڈاکٹروں اور نرسنگ اسٹاف کے پیشہ ورانہ رویے کو بھی سراہا۔ کچھ والدین نے شکایات اور تجاویز بھی پیش کیں، جنہیں معزز مہمانوں نے بغور سنا اور متعلقہ حکام کو بہتری کے لیے فوری ہدایات دیں۔
محترمہ آصفہ بھٹو زرداری نے کہا کہ سندھ حکومت کا صحت کے شعبے پر فوکس قابلِ فخر ہے۔ خاص طور پر بچوں اور ماؤں کے لیے بلا تفریق اور مفت علاج کی فراہمی ایک فلاحی ریاست کی بنیاد ہے۔ آج جو کام یہاں ہوتا نظر آیا، وہ پاکستان کے مستقبل کی صحت مند نسل کی ضمانت ہے۔
وزیرِ صحت ڈاکٹر عذرا فضل پیچوہو نے وفد کو بریفنگ دیتے ہوئے بتایا کہ سندھ حکومت (ایس آئی سی ایچ این) کے دائرہ کار کو مزید وسعت دے رہی ہے۔ کراچی میں چار بڑے مراکز (اعظم بستی، کورنگی، جناح اسپتال، سوبھراج) کے علاوہ، سکھر، نوابشاہ اور لاڑکانہ جیسے شہروں میں بھی جدید مراکز قائم کیے جا چکے ہیں، جہاں جدید مشینری، تربیت یافتہ عملہ اور 24 گھنٹے ایمرجنسی سروسز دستیاب ہیں۔
0 تبصرے