جھرڪ شھر جي سولنگي محلي واسين پاران پاڻي جي کوٽ ۽ ٻين مسئلن جي حل لاءِ احتجاج

ٺٽو(شفيق ڀٽي)جھرڪ شھر جي سولنگي محلي جي رهواسين پاران پاڻي جي کوٽ ,صفائي۽ بجلي جي مسلسل لوڊشيڊنگ خلاف احتجاجي مظاهرو ڪيو ويو. احتجاجي ريلي سولنگي محلي کان نڪري مين بازار تائين پهتي، جنهن جي اڳواڻي وحيد سولنگي، بهادر سولنگي، نويد سولنگي ۽ سليم سولنگي ڪري رهيا هئا.احتجاج دوران مظاهرين پاران پبلڪ هيلٿ ٺٽو، حيسڪو ۽ واپڊا خلاف سخت نعريبازي ڪئي وئي. مظاهرين جو چوڻ هو ته سندن محلو يونين ڪائونسل انتظاميا طرفان مسلسل نظرانداز ڪيو پيو وڃي، جتي نه پاڻي جي سهولت موجود آهي نه صفائي ۽ نه ئي بجلي جي لوڊشيڊنگ مان ڇوٽ ملي رهي آهي، جنهن سبب محلي وارا سخت پريشان آهن. صحافين سان ڳالهائيندي رهواسين چيو ته هو پيپلزپارٽي جا ووٽر آهن، پر ان باوجود سندن علائقو بنيادي سهولتن کان محروم آهي. هنن پيپلزپارٽي جي ايم اين اي صادق علي ميمڻ ۽ ايم پي اي رياض حسين شاهه شيرازي کان مطالبو ڪيو ته سولنگي محلي جي فوري سار سنڀال ڪئي وڃي. مظاهرين جو مطالبو هو ته سولنگي محلي کي نئين واٽر سپلائي اسڪيم مان پائپ لائين فراهم ڪئي وڃي، محلي ۾ صفائي جو مناسب بندوبست ڪيو وڃي ۽ بجلي جي لوشيڊنگ ختم ڪئي وڃي، جيئن علائقي واسي سڪون سان زندگي گذاري سگهن.