سانگهڙ ويجهو آئل ٽينڪر رڪشا مٿان چڙهي ويو، ماءُ ڌيءَ فوت، 3 ڄڻا زخمي

کڏڙو روڊ تي ميران اسٽاپ وٽ حادثي ۾ 3ورهين جي راڌيڪا ۽ سندس امڙ گلا ڪولهي ٿڏي تي فوت

سانگهڙ (رپورٽر) سانگهڙ ويجهو افسوسناڪ حادثو ماءُ ۽ 3 سالن جي ڌيءَ فوت، 3 ڄڻا سخت زخمي، سانگهڙ ويجهو کڏڙو روڊ تي ميران اسٽاپ وٽ تيل جي ٽينڪر ۽ رڪشا ڦٽي وچ ۾ زوردار ٽڪر ٿيو، جنهن جي نتيجي ۾ هڪ ئي خاندان جي ماءُ ۽ معصوم نياڻي فوت ٿي ويون، جڏهن ته ٻن ٻارڙن سميت ٽي ڄڻا سخت زخمي ٿي پيا آهن. واقعي بابت مليل تفصيلن موجب، ڳوٺ سائين بخش رند جا رهواسي ڪولهي برادري جا ماڻهو رڪشا ڦٽي تي سوار ٿي وڃي رهيا هئا ته پويان ايندڙ تيز رفتار آئل ٽينڪر کين چيڀاٽي ڇڏيو. حادثي جي نتيجي ۾ مسمات گلا ڪولهي ۽ سندس 3 سالن جي معصوم ڌيءَ راديڪا ڪولهي موقعي تي ئي دم ڏئي ڇڏيو. معصوم دايا ڪولهي، جيتو ۽ رامون شديد زخمي ٿي پيا. علائقي واسين موجب، رڪشا ڦٽو ۽ آئل ٽينڪر ٻئي کڏڙو کان سانگهڙ طرف اچي رهيا هئا ته ميران اسٽاپ وٽ آئل ٽينڪر بي قابو ٿي رڪشا مٿان چڙهي ويو. حادثي بعد مقامي ماڻهن ۽ پوليس امدادي ڪارروايون ڪندي فوتين جا لاش ۽ زخمين کي سول اسپتال سانگهڙ منتقل ڪيو، جتي زخمين جي حالت ڳڻتي جوڳي ٻڌائي وڃي ٿي. واقعي کانپوءِ سڄي علائقي ۾ ڪهرام مچي ويو آهي.