ملير: عبدالله ڳوٺ ۽ ڀرپاسي بجلي، پاڻي ۽ گئس جي بندش خلاف ڌرڻو

رهواسين قومي شاهراهه تي ڌرڻو هڻي روڊ کي ٻنهي پاسن کان بند ڪري ڇڏيو، گاڏين جون قطارون لڳي ويون

ملير (عبدالرشيد مورجھريو) پاڻي، بجلي ۽ گئس جي بندش خلاف عبدالله ڳوٺ سميت ڀرپاسي جي ڳوٺن جا رهواسي احتجاج ڪندا قومي شاهراه تي نڪري آيا، قومي شاهراهه تي ڌرڻو، روڊ بند، ٻنهي پاسن کان گاڏين جون ڊگهيون قطارون لڳي ويون، ڳوٺاڻن جي انتظاميا خلاف سخت نعريبازي، پاڻي ناهي ڇو ڀلا ڪربلا ڪربلا، اٺن ڏينهن کان پاڻي، بجلي ۽ گئس بند آهي، انتهائي اذيت مان گذري رهيا آهيون، ابراهيم حيدري ٽائون جي اربين رپين جي بجيٽ هوندي بنيادي سهولتن کان محروم آهيون، رهواسي تفصيل موجب عبداللہ ڳوٺ سميت ڀرپاسي جي ڳوٺن جا رهواسي وڏي تعداد ۾ جن معصوم ٻارڙن جي اڪثريت هئي پاڻي، بجلي ۽ گئس جي بندش خلاف احتجاج ڪندا قومي شاهراهه تي نڪري آيا ۽ ڌرڻو هڻي ويهي رهيا، جنهن سبب روڊ بند ٿي ويو، ٻنهي پاسن کان گاڏين جون ڊگهيون قطارون لڳي ويون، ڳوٺاڻن انتظاميا خلاف سخت نعريبازي ڪئي ته پاڻي ناهي ڇو ڀلا ڪربلا ڪربلا، ان موقعي تي ڳوٺاڻن صحافين کي ٻڌايو ته گذريل اٺن ڏينهن کان علائقي ۾ پاڻي، بجلي ۽ گئس اڻ لڀ آهي جنهن سبب سخت ڏکيائين کي منهن ڏئي رهيا آهيون، گهر ۾ رڌ پچاء به نٿو ڪري سگهجي جنهن سبب معصوم ٻارڙن بک تي اسڪول ۽ وڏن کي به بغير کاڌي پيتي جي ڊيوٽين تي وڃڻو ٿو پوي، پاڻي نه هجڻ سبب مسجدن ۾ نمازي به وضو ڪرڻ لاءِ پريشان آهن، هنن چيو ته ابراهيم حيدري ٽائون جي 4 ارب رپيا بجيٽ هوندي اسان انساني بنيادي سهولتن کان محروم آهيون هنن مطالبو ڪيو ته مسئلا حل ڪري سندن بيچيني ختم ڪئي وڃي.