سجاول: ڳوٺ جلال شاهه بخاري واسين جو بااثرن خلاف احتجاجي مظاھرو

آچار شيدي، رضيه، وزيرا، عزيز شيدي ۽ ياسمين زال عزيز شيدي پريس ڪلب پھچي احتجاج ڪيو

سجاول(رپورٽر) تعلقه شاهه بندر جي ڳوٺ جلال شاهه بخاري جي رهواسين ۽ الطاف شاهه بخاري جي هارين آچار شيدي، رضيه، وزيرا، عزيز شيدي ۽ ياسمين زال عزيز شيدي نيشنل پريس ڪلب سجاول ۾ پريس ڪانفرنس ڪندي الزام هنيو ته هو پنهنجي زمين تي ڪم ڪري رهيا هئا ته اوچتو ذوالفقار شاهه، امير علي شاهه، احمد شاهه، محمد شاهه، رفيق شاهه ۽ ٻين مٿن حملو ڪيو. سندن چوڻ موجب جوابدارن کين موتمار ڌمڪيون ڏنيون، گهر ساڙڻ جون ڌمڪيون پڻ ڏنيون، جڏهن ته وزيرا کي ڪهاڙي ۽ لٺين سان حملو ڪري زخمي ڪيو ويو.پريس ڪانفرنس ۾ متاثر ڌر چيو ته هو غريب ماڻهو آهن ۽ حملي کانپوءِ پنهنجن ٻارن سميت ٻين جي اوطاقن ۽ درن تي دربدر رهڻ تي مجبور آهن. هنن الزام هنيو ته ٻن ڏينهن کان کين انصاف نه ملي رهيو آهي. هنن ايس ايس پي سجاول کان مطالبو ڪيو ته واقعي جي شفاف جاچ ڪرائي جوابدارن خلاف قانون موجب سخت ڪارروائي ڪئي وڃي، کين تحفظ فراهم ڪيو وڃي ۽ انصاف ڏنو وڃي.