عمرڪوٽ ۾ سڪار ويلفيئر طرفان معاون اوزارن جي ورڇ جي تقريب منعقد

عمرڪوٽ(رپورٽ:ڪانجي مل رکيسر) سماجي تنظيم سڪار ويلفيئر آرگنائيزيشن عمرڪوٽ طرفان عمرڪوٽ ۾ معاون اوزارن جي ورڇ جي تقريب منعقد ڪئي وئي۔ سڪار ويلفيئر آرگنائيزيشن پاران ضلعي جي معذور ماڻهن ۾ معاون اوزار جهڙوڪ ويل چيئرون، ٽرائي سائيڪلون، ٻڌڻ جا اوزار ۽ واڪر ورهايا ويا۔ ان تقريب جو مقصد ٻهراڙي وارن علائقن ۾ رهندڙ معذور ماڻهن جي چرپر ۽ زندگي جي معيار کي بهتر بڻائڻ هو۔ ان موقعي تي وائيس چيئرمين ضلع ڪائونسل عمرڪوٽ ميان خالد ولهاري تقريب کي خطاب ڪندي چيو ته معذور ماڻهو تمام خاص هوندا آهن، تنهنڪري کين خاص ماڻهو چيو ويندو آهي، ڇاڪاڻ⁠تہ انهن جون ضرورتون عام ماڻهن کان مختلف ۽ خاص هونديون آهن۔ هن حڪومت سنڌ جي مختلف کاتن ۽ سڪار ويلفيئر آرگنائيزيشن جي وچ ۾ سهڪار کي ساراهيو ۽ پٺتي پيل ٻهراڙي وارن علائقن تائين رسائي جي ضرورت تي زور ڏنو۔ ايڊووڪيٽ محمد بخش ڪنڀار، ايگزيڪيوٽو ڊائريڪٽر سڪار ويلفيئر آرگنائيزيشن، خطاب ڪندي چيو ته ٻهراڙي وارن ضلعن ۾ چرپر لاءِ استعمال ٿيندڙ اوزارن جي سخت کوٽ آهي۔ هن چيو ته ويل چيئرون ۽ ٽرائي سائيڪلون رڳو اوزار نه آهن، پر اهي شموليت جا وسيلا آهن، جيڪي تعليم، روزگار ۽ سماجي سرگرمين تائين رسائي کي ممڪن بڻائين ٿا۔ هن حڪومت سنڌ جي معذور ماڻهن جي بااختياري واري کاتي جا ٿورا مڃيا، جنهن فنڊ فراهم ڪيا ۽ عمرڪوٽ ۾ معاون اوزارن جي ورڇ لاءِ سندن تنظيم تي اعتماد ڪيو۔ بااختياري کاتي براءِ افراد باهم معذوري (DEPD) ميرپورخاص جي ريجنل ڊائريڪٽر عبدالحميد ڏاهاني چيو ته حڪومت سنڌ معذور ماڻهن جي معاونتي اسڪيمن لاءِ خاص فنڊ مختص ڪيا آهن، جيڪي سماجي تنظيمن وسيلي شفاف طريقي سان حقدار ماڻهن تائين پهچايا وڃن ٿا. گورنمينٽ اسپيشل ايجوڪيشن اينڊ ريهيبليٽيشن سينٽر عمرڪوٽ جي پرنسپال خطاب ڪندي چيو ته ضلعي عمرڪوٽ ۾ معذور ماڻهن جي بحالي وارو اسڪول بهتر نموني ڪم ڪري رهيو آهي، ۽ معاون اوزارن جي هي ورڇ ضلعي جي معذور ماڻهن لاءِ خوش آئند قدم آهي۔ پروجيڪٽ مينيجر ڪميونٽي ورلڊ سروس ايشيا سيد شهاب الدين چيو ته معاون اوزار معذور ماڻهن کي باوقار ۽ خودمختيار زندگي گذارڻ جي قابل بڻائڻ ۾ انتهائي اهم آهن۔ سروپچند مالهي چيو ته اسان کي خاص ماڻهن کي عزت ڏيڻ گهرجي ۽ انهن کي اهو احساس ڏيارڻ گهرجي ته اهي ڪنهن کان گهٽ ناهن، ۽ کين به عام ماڻهن وانگر ترقي ڪرڻ جو حق حاصل آهي۔ محمد اظہر آرائين، صدر ڊسٽرڪٽ بار ايسوسيئيشن، خطاب ڪندي چيو ته سنڌ حڪومت معذور ماڻهن جي حقن جي تحفظ لاءِ بهترين قانونسازي ڪئي آهي۔ هاڻي اها اسان جي ذميواري آهي ته انهن قانونن تي عملدرآمد کي يقيني بڻايون ۽ خاص ماڻهن جي زندگي ۾ آسانيون پيدا ڪيون۔ سول سوسائٽي آرگنائيزيشنن حڪومت سنڌ کي يقين ڏياريو ته اسين سڀ گڏجي خاص ماڻهن جي حقن، وقار ۽ شموليت کي يقيني بڻائينداسين۔ آخر ۾ سماجي تنظيمن، سرڪاري ادارن، ميڊيا، سماجي ورڪرن ۽ شاگردن کي سندن سماجي خدمتن عيوض شيلڊون ۽ سرٽيفڪيٽ ورهايا ويا۔