ملير: ميمڻ ڳوٺ ۾ اڻڄاتل شخص جو گولي لڳل لاش هٿ

ابراهيم شاهه درگاهه ڀرسان سومر ڪنداڻي ڳوٺ مان لاش هٿ آيو

ملير (رپورٽ: عبدالرشيد مورجھريو) ملير جي ٿاڻي ميمڻ ڳوٺ جي حدن مان هڪ نامعلوم شخص جي گولي لڳل لاش هٿ آئي آهي، جنهن کانپوءِ پوليس جاچ شروع ڪري ڇڏي آهي۔تفصيلن موجب ابراهيم شاهه درگاهه ڀرسان سومر ڪنداني ڳوٺ ۾ اطلاع ملڻ تي پوليس واقعي واري هنڌ پهتي، جتي هڪ شخص جو گولي لڳل لاش مليو ، ابتدائي رپورٽ دوران معلوم ٿيو ته مقتول کي فائرنگ ڪري قتل ڪيو ويو آهي۔ واقعي واري هنڌ تان هڪ خول پڻ هٿ آيو، جنهن کي شاهدي طور پوليس پنهنجي تحويل ۾ وٺي ڇڏيو آهي۔ پوليس اختيارين موجب فوتي جي سڃاڻپ فوري طور تي نه ٿي سگهي آهي، جڏهن ته لاش کي ضابطي جي ڪارروائي لاءِ جناح پوسٽ گريجوئيٽ ميڊيڪل سينٽر منتقل ڪيو ويو آهي، جتي قانوني گهرجون پوريون ڪيون پيون وڃن۔ واقعي کانپوءِ پوليس مختلف پهلوئن کان جاچ شروع ڪري ڇڏي آهي۔ ٻئي پاسي واقعي سبب علائقي ۾ خوف ۽ هراس پکڙجي ويو آهي، جڏهن ته پوليس شهرين کي اپيل ڪئي آهي ته ڪنهن به مشڪوڪ سرگرمي جي اطلاع فوري طور تي ڏني وڃي ته جيئن جوابدارن کي جلد گرفتار ڪري سگهجي۔