عمرڪوٽ ۾ اسڪالرشپ ورڇ ۾ نظرانداز ڪرڻ خلاف مختلف برادرين جو احتجاج

مينارٽي افيئر ڊپارٽمينٽ تي ڀيل، ڪولهي، اوڏ ۽ ميگهواڙ برادرين سان ناانصافي جا الزام

عمرڪوٽ (رپورٽ:ڪانجي مل رکيسر) مينارٽي افيئر ڊپارٽمينٽ پاران جاري ڪيل اسڪالرشپن ۾ عمرڪوٽ ضلعي کي مبينه طور نظرانداز ڪرڻ خلاف مختلف برادرين جي ماڻهن عمرڪوٽ پريس ڪلب آڏو احتجاجي مظاهرو ڪيو، مظاهري جي اڳواڻي جيسارام ڀيل، پونجو ڪولهي، گهنشام اوڏ ۽ گيانچند ميگهواڙ ڪئي، جڏهن ته وڏي انگ ۾ مختلف برادرين سان تعلق رکندڙ ماڻهن شرڪت ڪئي، مظاهرين هٿن ۾ پلي ڪارڊ ۽ بينر کڻي مينارٽي افيئر ڊپارٽمينٽ خلاف نعريبازي ڪئي، ان موقعي تي اڳواڻن ميڊيا سان ڳالهائيندي الزام هنيو ته مينارٽي افيئر ڊپارٽمينٽ پاران اسڪالرشپن ۽ ٻين فلاحي منصوبن ۾ عمرڪوٽ ضلعي کي مسلسل نظرانداز ڪيو پيو وڃي، جنهن سبب هتان جي مستحق شاگردن ۽ خاندانن ۾ سخت بيچيني پکڙيل آهي، هنن چيو ته خاص طور ڀيل، ڪولهي، اوڏ ۽ ميگهواڙ برادرين سان امتيازي سلوڪ روا رکيو پيو وڃي ۽ هر ڀيري اسڪالرشپن سميت مختلف سهولتن جي ورڇ دوران انهن برادرين کي نظرانداز ڪيو وڃي ٿو، اڳواڻن مطالبو ڪيو ته اسڪالرشپن جي ورڇ جو شفاف جائزو وٺي عمرڪوٽ جي مستحق شاگردن کي سندن جائز حق فراهم ڪيا وڃن، مظاهرين سنڌ جي صوبائي وزير براءِ مينارٽي افيئرز ڊاڪٽر شام سندر آڏواڻي کي اپيل ڪئي ته معاملي جو نوٽيس وٺي عمرڪوٽ جي اقليتي برادرين سان ٿيندڙ ناانصافي جو ازالو ڪيو وڃي، هنن خبردار ڪيو ته جيڪڏهن سندن جائز مطالبن تي ڌيان نه ڏنو ويو ته احتجاج جو دائرو وڌائي باقاعده احتجاجي تحريڪ هلائي ويندي.