عمرڪوٽ ۾ خطرناڪ ڊيمز سبب ٻارن جي ٻڏڻ جا واقعا وڌي ويا، اختيارين کان نوٽيس وٺڻ جو مطالبو

عمرڪوٽ (رپورٽ:ڪانجي مل رکيسر) عمرڪوٽ ضلعي ۾ بٺن مالڪن ۽ زميندارن جي مبينا لاپرواهي سبب پاڻي اسٽوريج لاءِ ٺاهيل ڊيمز انساني زندگين لاءِ خطرو بڻجي ويا آهن، جتي ٻڏڻ جا واقعا تيزي سان وڌڻ لڳا آهن، علائقي واسين موجب بٺن ۽ زرعي زمينن ڀرسان ٺاهيل انهن کوھن ۾ مناسب حفاظتي انتظام نه هجڻ ڪري روزانو جاني نقصان جا خدشا وڌي رهيا آهن، تازو پيش آيل واقعي ۾ تقريبن 11 ورهين جي نينگري شاردا اوڏ اسڪول مان گهر موٽندي ڊيم وٽ هٿ پير ڌوئڻ دوران پير ترڪڻ سبب پاڻي ۾ ڪري پئي ۽ ٻڏي فوت ٿي وئي، ذريعن موجب اهڙي نوعيت جا واقعا اڳ به پيش اچي چڪا آهن، جڏهن ته گذريل سال به 7 کان 10 ورهين جي عمر وارا ٻه ٽي ٻارڙا اهڙن ئي ڊيمز ۾ ٻڏي فوت ٿي ويا هئا، مقامي ماڻهن جو چوڻ آهي ته گرمي جي موسم ۾ ٻار پاڻي ڏسي وهنجڻ يا کيڏڻ لاءِ انهن هنڌن ڏانهن رخ ڪن ٿا، پر کين خطري جي شدت جو اندازو نه هوندو آهي، سندن چوڻ آهي ته حفاظتي اپائن جي کوٽ ۽ لاپرواهي سبب اهڙا حادثا معمول بڻجي رهيا آهن، سماجي اڳواڻن ڊپٽي ڪمشنر عمرڪوٽ کان مطالبو ڪيو آهي ته معاملي جو فوري نوٽيس وٺي ذميوارن خلاف ڪارروائي ڪئي وڃي، جڏهن ته خطرناڪ ڊيمز کي بند ڪرڻ يا انهن جي چوڌاري حفاظتي باڙ لڳائڻ سميت موثر قدم کنيا وڃن، علائقي واسين خبردار ڪيو آهي ته جيڪڏهن ترت قدم نه کنيا ويا ته ايندڙ ڏينهن ۾ وڌيڪَ جاني نقصان جو امڪان وڌي سگهي ٿو.