نوشهروفيروز ۾ جديد زرعي مشينريءَ جي نمائش جو پروگرام منعقد

ملت ٽريڪٽرز پاران پروگرام منعقد ڪيو ويو، محمد عثمان ۽ ٻيا شريڪ

مورو (جاني جماڻي) نوشهروفيروز ۾ ملت ٽريڪٽرز پاران جديد زرعي مشينريءَ جي نمائش جو پروگرام منعقد ڪيو ويو. پروگرام ۾ مهمانِ خاص طور سنڌ-بلوچستان انچارج محمد عثمان، سروس انچارج سليم حماد، شوڪت پارٽس انچارج انوار اڪرم، لاهور هيڊ آفيس انچارج عدنان شفيق ۽ سنڌ انچارج گل زمان شرڪت ڪئي. سهيل احمد آرائين، محمد اڪرم آرائين، محمد اعجاز آرائين ۽ حنان آرائين پاران آيل مهمانن کي سنڌ جي ثقافتي سڃاڻپ ٽوپي ۽ اجرڪ جا تحفا پيش ڪيا ويا. تقريب کي خطاب ڪندي مقررن چيو ته ملت ٽريڪٽر ڪمپنيءَ جي هيءَ نمائش زراعت سان لاڳاپيل ماڻهن لاءِ هڪ اهم اڳڀرائي آهي. نمائش ۾ مختلف هارس پاور جا ننڍا ۽ وڏا ٽريڪٽر رکيا ويا ته جيئن هر سطح جو آبادگار پنهنجي ضرورت آهر چونڊ ڪري سگهي. ڪمپنيءَ جي نمائندن ٽريڪٽرن جي خصوصيتن، ٻارڻ جي بچت ۽ ڪارڪردگيءَ بابت تفصيلي بريفنگ ڏني ۽ جديد ٽيڪنالاجيءَ جي استعمال بابت آگاهي فراهم ڪئي. هارين نمائش کي ساراهيندي چيو ته اهڙن قدمن سان جديد زرعي اوزارن تائين پهچ ممڪن ٿيندي آهي جنهن سان پيداوار ۾ واڌ ايندي. هنن چيو ته حڪومت ۽ خانگي ادارا ٻهراڙيءَ وارن علائقن ۾ اهڙين سرگرمين کي هٿي ڏين ته جيئن زرعي شعبو وڌيڪ ترقي ڪري. شرڪت ڪندڙن جو چوڻ هو ته جديد ٽريڪٽر وقت ۽ محنت ٻنهي جي بچت ڪن ٿا جنهن جو سڌو فائدو هاريءَ کي ملندو آهي. آخر ۾ ڪمپني اختيارين يقين ڏياريو ته هارين کي جديد سهولتن مان فائدو ڏيارڻ لاءِ اڳتي به اهڙين نمائشن جو انعقاد جاري رکيو ويندو.انهي موقعي تي صحافي ظفر پنهور صحافي جاني جماڻي صحافي عارف يوسفزئي شرڪت ڪئي