رزاق آباد ۾ نيڪالي جو نظام تباهه، علائقا گندي پاڻي ۾ ٻڏي ويا، رهواسي اذيت جو شڪار

مين بازار، غريب آباد، ڪلمتي پاڙو ۽ قومي شاهراهه جي ڀرپاسي وارا علائقا به گٽر جي گندي پاڻي هيٺ اچي ويا

ملير (رپورٽ: عبدالرشيد مورجھريو) رزاق آباد ۾ نيڪالي جو نظام مڪمل طور تي ناڪاره ٿي ويو آهي جنهن سبب مين بازار، غريب آباد، ڪلمتي پاڙو ۽ قومي شاهراهه جي ڀرپاسي وارا علائقا گٽر جي گندي پاڻي ۾ ٻڏي ويا آهن گندگي سبب اچ وڃ ۽ ڪاروباري سرگرميون سخت متاثر ٿي ويون آهن ٽائون ابراهيم حيدري جي آفيس لڳ رزاق آباد جي مين ڊسپوزل لائن جي صفائي نه ٿيڻ سبب گٽر جا مين هول اُٿلي پيا آهن جنهن ڪري گندو پاڻي روڊن، گهٽين، چوڪن ۽ گهرن ۾ داخل ٿي ويو آهي صورتحال سبب شهري سخت تڪليف ۽ اذيت جو شڪار بڻيل آهن علائقي واسين اقبال ڪلمتي، حسين بخش ڪلمتي، محمد شاهه، منير شاهه، غلام حسين ۽ ٻين سخت احتجاج ڪندي چيو آهي ته يوسي چوڪنڊي ۽ ٽائون ابراهيم حيدري انتظاميه جي نااهلي سبب گذريل برساتن کانپوءِ پورو علائقو اڃان تائين گٽر جي گندي پاڻي ۾ ٻڏل آهي پر ڪو به ٻڌڻ وارو ناهي هنن ٻڌايو ته نيڪالي جي مسئلي جي حل لاءِ ڪيترائي ڀيرا شڪايتون داخل ڪرايون ويون ۽ احتجاج به ڪيو ويو پر اربين رپين جي بجيٽ باوجود انتظاميه مسئلو حل ڪرڻ ۾ سنجيده نظر نٿي اچي رهواسين اعليٰ اختيارين کان فوري نوٽيس وٺي نيڪالي جي نظام جي بحالي ۽ پاڻي جي نيڪال لاءِ اثرائتا انتظام ڪرڻ جو مطالبو ڪيو آهي ته جيئن شهرين جي هن اهم مسئلي جو خاتمو ٿي سگهي.