سجاول ۾ استادن جو 2023 جي آدمشماري جو معاوضو نھ ملڻ خلاف احتجاج

سخت گرمي ۽ ڏکين حالتن ۾ قومي ذميواري نڀائي، پر معاوضو اڃا تائين ناھي مليو: استاد

سجاول (رپورٽر) 2023ع جي آدمشماري جو معاوضو نہ ملڻ خلاف استادن ڊپٽي ڪمشنر آفيس اڳيان احتجاجي مظاهرو ڪيو. ضلعي سجاول ۾ 2023ع جي آدمشماري جو معاوضو ٽن سالن کان پوءِ بہ ادا نہ ٿيڻ خلاف استادن ڊپٽي ڪمشنر آفيس اڳيان احتجاج ڪيو. ان موقعي تي مظاهرين چيو تہ هنن سخت گرمي ۽ ڏکين حالتن ۾ قومي ذميواري نڀائي، پر اڄ تائين کين سندن معاوضو ادا نہ ڪيو ويو آهي. استادن موجب پاڪستان بيورو آف اسٽيٽسٽڪس (PBS) آدمشماري جو معاوضو ڊپٽي ڪمشنر آفيس ڏانهن منتقل ڪري چڪو آهي، پر ان باوجود ادائيگي اڃا تائين رڪيل آهي. هنن مطالبو ڪيو تہ سندن جائز معاوضو بنا ڪنهن وڌيڪ دير جي فوري طور جاري ڪيو وڃي ۽ ادائيگين ۾ ٿيندڙ دير جو سلسلو ختم ڪيو وڃي. مظاهرين وڌيڪ چيو تہ هر قومي مهم دوران استادن کان خدمتون ورتيون وڃن ٿيون، پر سندن حقن جي ادائيگي ۾ مسلسل دير ڪئي وڃي ٿي، جيڪا ناانصافي آهي. استادن خبردار ڪيو تہ جيڪڏهن سندن معاوضو فوري طور ادا نہ ڪيو ويو تہ هو پنهنجي احتجاج جو دائرو وڌيڪ وسيع ڪندا.