پپري ۾ وڌندڙ بدامني خلاف رهواسي رستن تي نڪري آيا، احتجاجي ريلي ۽ ڌرڻو

پپري ۾ بدامني وڌي وئي آهي، هر روز هٿياربند گھرن ۽ دڪانن جي اڳيان گشت ڪري فرار ٿي وڃن ٿا: اڳواڻ

ملير (رپورٽ: عبدالرشيد مورجھريو)بن قاسم پپري ۾ وڌندڙ بدامني خلاف رهواسي وڏي تعداد ۾ احتجاج ڪندا رستن تي نڪري آيا جن جي اڳواڻي امير جھتيال، جاويد مزاري، عرفان سولنگي، منان شيخ، مصطفي راھوجو، آياز گبول ۽ ٻيا ڪري رهيا هئا ان موقعي تي سوين شھري ۽ دڪاندار پپري چوڪ کان فٽبال گرائونڊ تائين احتجاجي ريلي ڪڍي سخت نعريبازي ڪئي . مظاهرو ڪندڙن دڪان بند ڪري .احتجاجي ريلي ڪڍي ان دوران اڳواڻن چيو ته پپري ۾ بدامني وڌي وئي آهي، هر روز هٿياربند شخصن گھرن ۽ دڪانن جي اڳيان گشت ڪري فرار ٿي وڃن ٿا، جنهن سبب عوام خوف جي ڪري گهرن کان ٻاهر نه نڪري سگھي ٿي. اڳواڻن زور ڀريو ته پوليس عوام جي جان ۽ مال جي تحفظ ۾ ناڪام ٿي چڪي آهي.انهن مطالبو ڪيو ته آئي جي سنڌ، ڊي آئي جي ايسٽ ۽ ايس ايس پي ملير کي فوري طور تي بن قاسم پوليس اسٽيشن تي ايماندار ۽ قابليت رکندڙ ايس ايڇ او مقرر ڪرڻ گهرجي ته جيئن عوام جي جان ۽ مال جو تحفظ يقيني بڻائي سگهجي.