ڊپٽي ڪمشنر عمرڪوٽ نويد الرحمان لاڙڪ جي صدارت هيٺ ڊي سي سي جو اجلاس

اجلاس ۾ ايس ايس پي عمرڪوٽ عذير احمد ميمڻ، ايڊيشنل ڊپٽي ڪمشنر ٽو عمران آرائين ۽ ٻيا شريڪ

عمرڪوٽ (رپورٽ:ڪانجي مل رکيسر) ڊپٽي ڪمشنر عمرڪوٽ نويد الرحمان لاڙڪ جي صدارت هيٺ ڊسٽرڪٽ ڪوآرڊينيشن ڪميٽي (DCC) جو هڪ اهم اجلاس ڊپٽي ڪمشنر آفيس عمرڪوٽ جي درٻار هال ۾ منعقد ٿيو، اجلاس ۾ ايس ايس پي عمرڪوٽ عذير احمد ميمڻ، ايڊيشنل ڊپٽي ڪمشنر ٽو عمران آرائين، ڊپٽي ڊائريڪٽر سوشل ويلفيئر عمرڪوٽ نور محمد شيخ، چيف ميونسپل آفيسر عمرڪوٽ سيد ساجد علي شاھ، ڊسٽرڪٽ انفارميشن آفيسر عمرڪوٽ محمد اسلم ڀٽي، ڊسٽرڪٽ اسپورٽس آفيسر عمرڪوٽ، ڊپٽي ڊائريڪٽر وومين ڊيولپمينٽ عمرڪوٽ، ايڊيشنل ڊائريڪٽر لوڪل گورنمينٽ، ڊپٽي ڊائريڪٽر لوڪل گورنمينٽ هريش چندر، ڊپٽي ڊائريڪٽر نيشنل هاءِ ويز اٿارٽي اسدالله ميمڻ، ڊپٽي ڊائريڪٽر زراعت اياز ڪاڇيلو، انسپيڪٽر ايڪسائيز عمرڪوٽ شھمير خان، سيڪريٽري آر ٽي اي سيد شيراز علي شاھ، حساس ادارن سي ٽي ڊي، آءِ ايس آءِ، آءِ بي، ايم آءِ، اسپيشل برانچ سميت ضلع عمرڪوٽ جي سڀني لاڳاپيل کاتن جي سربراهن ۽ نمائندن شرڪت ڪئي، اجلاس دوران امن امان جي مجموعي صورتحال، سرڪاري کاتن جي باهمي رابطن، انسداد منشيات، قبضا ختم ڪرڻ، صحت ۽ تعليم، بلديات کاتي، بجلي جي فراهمي، ٽريفڪ مينيجمينٽ، سماجي ڀلائي ۽ عوامي شڪايتن جي ازالي سميت ٻين اهم معاملن تي تفصيلي غور ويچار ڪيو ويو، ان موقعي تي ڊپٽي ڪمشنر عمرڪوٽ نويد الرحمان لاڙڪ اجلاس کي خطاب ڪندي چيو ته ضلعي ۾ امن امان جو قيام ۽ عوام کي بنيادي سهولتن جي فراهمي ضلعي انتظاميه جي اولين ترجيح آهي، هن سڀني کاتن جي آفيسرن کي هدايت ڪئي ته باهمي سهڪار ۽ مربوط حڪمت عملي تحت پنهنجون ذميواريون بهتر نموني نڀائن ۽ جاري ترقياتي اسڪيمَن ۾ تيزي آندي وڃي، اجلاس ۾ گذريل ڊسٽرڪٽ ڪوآرڊينيشن ڪميٽي جي فيصلن تي عملدرآمد جو جائزو پڻ ورتو ويو، جڏهن ته لاڳاپيل آفيسرن پنهنجي ڪارڪردگي ۽ پيش رفت بابت اجلاس کي آگاهه ڪيو، ان موقعي تي ڊپٽي ڪمشنر ڪجهه معاملن ۾ سستي تي ناراضگي جو اظهار ڪندي فوري بهتري جون هدايتون جاري ڪيون، هن اين ايڇ اي جي آفيسرن کي هدايت ڪئي ته راجا رستي کان عمرڪوٽ تائين روڊن تي جاري ڪم کي وڌيڪ تيز ڪري جلد مڪمل ڪيو وڃي، ان موقعي تي ايس ايس پي عمرڪوٽ عذير احمد ميمڻ اجلاس کي خطاب ڪندي چيو ته سيف سٽي پروجيڪٽ بابت ميونسپل ڪميٽي جي عملدارن سان صلاح مشورا جاري آهن ۽ جلد ئي اهو منصوبو مڪمل ڪيو ويندو، جڏهن ته امن امان جي حوالي سان سيڪيورٽي جا سخت انتظام ڪيا ويا آهن، ان موقعي تي ڊپٽي ڪمشنر عمرڪوٽ نويد الرحمان لاڙڪ واضح ڪيو ته عوامي مفاد جي منصوبن ۾ ڪنهن به قسم جي غفلت يا لاپرواهي برداشت نه ڪئي ويندي ۽ سڀئي کاتا پنهنجي ڪارڪردگي بهتر بڻائي نتيجن تي ٻڌل قدم يقيني بڻائن، اجلاس جي پڄاڻي تي مختلف معاملن بابت اهم فيصلا ڪيا ويا ۽ انهن تي بروقت عملدرآمد کي يقيني بڻائڻ لاءِ لاڳاپيل کاتن کي واضح هدايتون جاري ڪيون ويون.